پاکستان پیپلز پارٹی کے سیکرٹری اطلاعات ندیم افضل چن کی پیپلز پارٹی کے صوبہ بچاؤ حکومتی کرپشن کے خلاف احتجاج پر شیلنگ و آنسو گیس کی مذمت

پیر 26 مئی 2025 21:30

اسلام آباد (اُردو پوائنٹ اخبارتازہ ترین - اے پی پی۔ 26 مئی2025ء) پاکستان پیپلز پارٹی کے سیکرٹری اطلاعات ندیم افضل چن نے پشاور میں صوبہ بچاؤ تحریک کے تحت نکالی گئی پیپلز پارٹی ریلی پر حملے کی شدید الفاظ میں مذمت کرتے ہوئے کہا ہے کہ پیپلز پارٹی پرامن جمہوری جدوجہد پر یقین رکھتی ہے اور صوبہ بچاؤ تحریک ہر حال میں جاری رہے گی۔ پیر کو پی پی پی میڈیا سیل سے جاری بیان کے مطابق انہوں نے کہا کہ پرامن سیاسی کارکنوں پر ریاستی تشدد خیبرپختونخوا حکومت کے فاشسٹ عزائم کو بے نقاب کرتا ہے، یہ حملہ جمہوریت، آئین اور سیاسی آزادی پر حملہ ہے۔

ندیم افضل چن نے کہا کہ خیبرپختونخوا میں پیپلز پارٹی کی بڑھتی ہوئی مقبولیت سے خوفزدہ حکومت اوچھے ہتھکنڈوں پر اتر آئی ہے۔ انہوں نے پاکستان پیپلزپارٹی کی پرامن خواتین ورکرز پر تشدد کو صوبائی حکومت کا ایک بہیمانہ عمل قرار دے دیا ہے۔

(جاری ہے)

انہوں نے کہا کہ حکومت کا رویہ نہ صرف غیر جمہوری ہے بلکہ اس سے صوبے میں بدامنی اور سیاسی انتشار کو ہوا دی جا رہی ہے۔

سیکرٹری اطلاعات نے مطالبہ کیا کہ ریلی پر حملے میں ملوث عناصر کو فوری گرفتار کر کے قانون کے کٹہرے میں لایا جائے۔ انہوں نے کہا کہ ہم اپنے کارکنان و خواتین کے حوصلے کو سلام پیش کرتے ہیں جو ظلم کے خلاف ڈٹ کر کھڑے ہیں، خیبرپختونخوا کے عوام باشعور ہیں اور وہ اس جبر کا جواب ووٹ کی طاقت سے دیں گے۔ندیم افضل چن نے کہا کہ پیپلز پارٹی پرامن جمہوری جدوجہد پر یقین رکھتی ہے اور صوبہ بچاؤ تحریک ہر حال میں جاری رہے گی۔