Live Updates

پاکستانی قونصلیٹ جدہ کے زیرِ اہتمام "یومِ تشکر" کی پروقار تقریب

افواجِ پاکستان کو آپریشن "بنیان المرصوص" کی کامیابی پر خراجِ تحسین

عرفان کھٹانہ پیر 26 مئی 2025 22:39

پاکستانی قونصلیٹ جدہ کے زیرِ اہتمام "یومِ تشکر" کی پروقار تقریب

جدہ(اُردو پوائنٹ اخبارتازہ ترین۔ 26 مئی 2025ء) پاکستان قونصلیٹ جدہ کے زیراہتمام پاکستانی اسکول میں "یومِ تشکر" کی ایک شاندار اور پرجوش تقریب کا انعقاد کیا گیا، جس میں افواجِ پاکستان کو آپریشن "بنیان المرصوص" کی شاندار کامیابیوں پر خراجِ تحسین پیش کیا گیا۔تقریب سے خطاب کرتے ہوئے قونصل جنرل جدہ خالد مجید نے کہا کہ افواجِ پاکستان نے جرات و بہادری سے دشمن کے ناپاک عزائم کو ناکام بنایا، جو پوری قوم کے لیے باعثِ فخر ہے۔

انہوں نے کہا کہ بیرون ملک مقیم پاکستانی اپنے محافظوں کے ساتھ کھڑے ہیں اور ملک کی ترقی کے لیے قومی اتحاد و یگانگت انتہائی ضروری ہے۔کشمیر کمیٹی کے چیئرمین مسعود احمد پوری نے خطاب کرتے ہوئے افواجِ پاکستان کو خراجِ عقیدت پیش کیا اور عالمی برادری سے مطالبہ کیا کہ مسئلہ کشمیر کو اقوامِ متحدہ کی قراردادوں کے مطابق حل کیا جائے۔

(جاری ہے)

پریس قونصلر عرفان چوہدری نے اردو اور عربی زبان میں پاک سعودی دوستی پر مبنی ایک خصوصی ترانہ پیش کیا، جسے حاضرین نے خوب سراہا۔

تقریب میں جدہ میں مقیم پاکستانی کمیونٹی کی ممتاز شخصیات، افواجِ پاکستان کے جوان، قونصلیٹ کے افسران، اساتذہ، والدین اور طلبہ و طالبات نے بڑی تعداد میں شرکت کی۔اس موقع پر معروف پاکستانی گلوکار نعیم سندھ نے ملی نغمے اور خصوصی ویڈیوز کے ذریعے شرکاء کے جوش و جذبے کو گرمایا، جبکہ پاکستانی اسکول کے طلبہ نے افواجِ پاکستان کی وردی میں ملبوس ہو کر ایک خوبصورت ٹیبلو پیش کیا، جسے شرکاء نے بھرپور داد دی۔تقریب کے دوران 28 مئی "یومِ تکبیر" کے حوالے سے بھی خصوصی ویڈیوز دکھائی گئیں، جنہوں نے محب وطن جذبات کو مزید جلا بخشی۔آخر میں پاکستان کی ترقی، امن اور خوشحالی کے لیے خصوصی دعا کی گئی، جس میں تمام شرکاء نے بھرپور شرکت کی۔