Live Updates

کچھ لو اور کچھ دو کے معنی اگر ڈیل، سودے بازی اور این آر او نہیں تو کیا ہیں؟ سینیٹر عرفان صدیقی کا پی ٹی آئی سے سوال

عمران خان کے پاس کسی کو دینے کیلئے کیا رہ گیا ہے؟، تحریک انصاف پہلے یہ طے کرلے کہ کیا بات کرنی ہے؟ کس نے کرنی ہے؟اورکس سے کرنی ہے؟، پی ٹی آئی کی کسی بھی احتجاجی کال پر عوام سڑکوں پر نہیں نکلیں گے، رہنماء ن لیگ کا بیان

فیصل علوی بدھ 28 مئی 2025 10:44

کچھ لو اور کچھ دو کے معنی اگر ڈیل، سودے بازی اور این آر او نہیں تو کیا ..

اسلام آباد(اردوپوائنٹ اخبار تازہ ترین۔28 مئی 2025)پاکستان مسلم لیگ ن کے سینیٹر عرفان صدیقی نے پی ٹی آئی سے سوال کرتے ہوئے کہا کہ کچھ لو اور کچھ دو کے معنی اگر ڈیل، سودے بازی اور این آر او نہیں تو کیا ہیں؟ بانی پی ٹی آئی عمران خان کے پاس کسی کو دینے کیلئے کیا رہ گیا ہے؟، پاکستان تحریک انصاف کی کسی بھی احتجاجی کال پر عوام سڑکوں پر نہیں نکلیں گے،اپنے ایک بیان میں رہنماء ن لیگ نے کہا کہ تحریک انصاف پہلے یہ طے کرلے کہ کیا بات کرنی ہے؟ کس نے کرنی ہے؟اورکس سے کرنی ہے؟ یہ پہلے بھی مذاکرات سے بھاگ گئے تھے۔

پی ٹی آئی حکومت کے خلاف تحریک عدم اعتماد لاتی ہے تو ان کے اپنے ارکان ساتھ چھوڑ جائیں گے۔تحریک انصاف اگ عدم اعتماد لائے ہمارے تو نہیں پی ٹی آئی کے لوگ ضرورکم ہوجائیں گے۔

(جاری ہے)

انہوں نے کہا کہ انتشارکی سیاست سے عوام مایوس ہو چکے ہیں اورملک اب صرف سنجیدہ سیاسی روئیے ہی برداشت کرسکتا ہے۔ یاد رہے کہ گزشتہ روز بانی پی ٹی آئی کی ہمشیرہ علیمہ خان کا کہنا تھا کہ ہمیں بتایاجائے کہ عمران خان سے ان کو کیا مسئلہ تھا۔

ہمارے بھائی نے آپ کو کیا کہا ہے؟،بتایا جائے بانی پی ٹی آئی نے آپ کا کیا بگاڑا تھا۔ ہمارا بھائی کہہ رہا ہے کہ مجھے ساری زندگی جیل میں رکھیں میں پیچھے نہیں ہٹوں گا۔ اسلام آباد ہائیکورٹ کے باہر پی ٹی آئی چیئرمین بیرسٹرگوہر اور وزیراعلیٰ خیبرپختونخواہ علی امین گنڈاپور کے ہمراہ میڈیا سے گفتگو کرتے ہوئے بانی پی ٹی آئی کی ہمشیرہ نے کہا تھا کہ بانی پی ٹی آئی بات چیت کیلئے تیار ہیں۔

کچھ لو اور کچھ دو کیلئے بھی تیار ہیں۔ہمیں بتائیں بانی پی ٹی آئی کیا چیز چھوڑ دے کہ آپ رہا کردیں گے؟۔ ہمیں آج تک یہ نہیں پتا چلا کہ آپ کو ہمارے بھائی سے کیاچاہیے تھا۔ آپ پیچھے نہ بیٹھیں سامنے آ کر بیٹھیں ہم تیار ہیں۔جو کاز لسٹ سے نام نکلوا رہے ہیں ان سے میں کہنا چاہوں گی کہ پیچھے سے کام نہ کریں۔ ہم بہنیں بیٹھی ہیں ہمیں بتائیں کیا مسئلہ تھا۔

انہوں نے کہا تھاکہ آپ کس قسم کے لوگ ہیں؟ فرعونیت نہ کہیں تو کیا کہیں؟ آپ ممبران پارلیمنٹ کو نہ دھمکائیں۔ آئے روز ہمارے ممبران کو دھمکیاں دی جاتی ہیں۔ ہمیں دھمکی آتی ہے کہ آپ کا ایکسیڈنٹ ہو جائے گا۔ ہم نہیں ڈر رہے تھے۔ علیمہ خان کامزید یہ بھی کہنا تھا کہ ممبران قومی اسمبلی و صوبائی اسمبلی یہاں آئے ہیں انہوں نے ہماری فیملی کا ساتھ دیا ہے اور ہمارے ساتھ یکجہتی کااظہار کیاہے۔بانی پی ٹی آئی عمران خان کے خلاف تمام مقدمات جھوٹے ہیں۔بانی پی ٹی آئی بے بنیاد مقدمات میں قیدکی صعوبتیں برداشت کررہے ہیںاس لئے ان کے مقدمات میں انصاف کریں اور جلد فیصلے دیں۔