Live Updates

چھوٹی گاڑیوں کی قیمتوں میں لاکھوں روپے کمی کا امکان

حکومت کی جانب سے آئندہ مالی سال کے بجٹ میں پرانی گاڑیوں کی امپورٹ پر عائد ٹیکسوں میں ریلیف دیے جانے کا امکان، گاڑیاں سستی ہو جائیں گی

محمد علی بدھ 28 مئی 2025 20:23

لاہور ( اردوپوائنٹ اخبار تازہ ترین ۔ 28 مئی 2025ء ) چھوٹی گاڑیوں کی قیمتوں میں لاکھوں روپے کمی کا امکان، حکومت کی جانب سے آئندہ مالی سال کے بجٹ میں پرانی گاڑیوں کی امپورٹ پر عائد ٹیکسوں میں ریلیف دیے جانے کا امکان، گاڑیاں سستی ہو جائیں گی۔ تفصیلات کے مطابق گزشتہ 3 سالوں کے دوران ملک میں استعمال شدہ اور نئی گاڑیوں کی قیمتوں میں 100 فیصد سے بھی زائد کا اضافہ ہو جانے کے بعد اب دعوٰی کیا جا رہا ہے کہ آئندہ مالی سال کے دوران ملک میں خاص کر چھوٹی گاڑیوں کی قیمتوں میں لاکھوں روپے کی بڑی کمی ہو سکتی ہے۔

اس حوالے سے ایکسپریس نیوز کی رپورٹ کے مطابق آل پاکستان موٹر ڈیلرز ایسوسی ایشن کے چیئرمین ایچ ایم شہزاد نے دعوٰی کیا ہے کہ امکان ہے کہ آئندہ وفاقی بجٹ میں استعمال شدہ گاڑیوں کی امپورٹ پر ڈیوٹیز میں نمایاں کمی آئے گی۔

(جاری ہے)

آئندہ مالی سال کے دوران حکومت کی جانب سے استعمال شدہ گاڑیوں کی امپورٹ سے متعلق 3 سال کی ایج لیمٹ کو 5 سال تک بڑھانے کا فیصلہ متوقع ہے۔

دعوٰی کیا گیا ہے کہ حکومت کے اس متوقع فیصلے کے نتیجے میں ملک میں چھوٹی گاڑیوں کی قیمت میں 5 سے دس لاکھ روپے کمی کا امکان ہے۔ ایسا ہونے کی صورت میں چھوٹی گاڑی 20 لاکھ روپے سے کم میں دستیاب ہوگی۔ بتایا گیا ہے کہ پاکستان نے آئی ایم ایف کو یقین دہانی کرائی ہے کہ آئندہ 5 سال کے دوران استعمال شدہ گاڑیوں پر عائد بھاری ڈیوٹیز اور ٹیکسز کو بتدریج کم کیا جائے گا اور سیلز ٹیکس یا کسٹمز ڈیوٹی میں سے کسی ایک شکل میں مسابقتی ٹیکس عائد ہوگا۔

اگر حکومت نے 5 سال پرانی گاڑیوں کی امپورٹ اور کمرشل بنیادوں پر درآمد کی اجازت دے دی تو گاڑیوں کی قیمتوں میں بڑی کمی ہو گی کیونکہ جاپان میں 5 سال پرانی گاڑی 5 سال پرانی گاڑی کے مقابلے میں تقریباً آدھی قیمت پر دستیاب ہوتی ہے۔ مزید بتایا گیا ہے کہ اس وقت گاڑیوں پر مجموعی ڈیوٹیز 96 فیصد سے لے کر 475 فیصد ڈیوٹی عائد ہے جنہیں آئندہ پانچ سال میں بتدریج ہر سال 20 فیصد کم کیا جائے گا۔