امریکی وفاقی عدالت نے امریکی صدرڈونلڈ ٹرمپ کے تجارتی ٹیرف کو غیرقانونی قراردیدیا

واشنگٹن(اردوپوائنٹ اخبار تازہ ترین۔29 مئی 2025)امریکی وفاقی عدالت کی جانب سے صدر ٹرمپ کے تجارتی ٹیرف کو غیرقانونی قراردیدیا، ٹرمپ انتظامیہ نے وفاقی عدالت کے فیصلے کے خلاف اپیل دائر کر دی،امریکی عدالت نے کہا کہ ٹیرف کا قانون صدر کو یکطرفہ طور پر عائد کرنے کی اجازت نہیں دیتا،نیویارک کے مانہٹن میں قائم عدالت کاکہنا ہے کہ امریکی آئین کانگریس کو دوسرے ممالک کے ساتھ تجارت کو باقاعدہ کرنے کے حوالے سے خصوصی اختیارات دیتا ہے اور یہ اختیارات صدر کے اقتصادی تحفظ کے اختیارات سے بالا تر ہیں۔

نیویارک کی اٹارنی جنرل جنہوں نے اس مقدمے میں شامل 12 ریاستوں کی نمائندگی کی نے اس فیصلے کا خیرمقدم کیا۔ نیویارک عدالت کی اٹارنی جنرل لیٹیثیا جیمز کا کہنا تھا کہ قانون واضح ہے کہ کوئی بھی صدر یہ اختیار نہیں رکھتا کہ جب چاہے ٹیکس بڑھا سکے۔

(جاری ہے)

ان کا یہ بھی کہنا تھا کہ یہ محصولات کام کرنے والے خاندانوں اور امریکی کاروباروں پر ایک بڑا ٹیکس بوجھ ڈالیں گے جس سے مہنگائی میں اضافہ ہوتا۔

کاروباروں کو معاشی نقصان پہنچتا اور ملک بھر میں بے روزگاری بڑھتی اگر انہیں جاری رکھا جاتا۔دوسری جانب امریکی وفاقی عدالت کی جانب سے فیصلے آنے کے بعدٹرمپ انتظامیہ نے عدالت کے فیصلے کے خلاف اپیل دائر کی۔ وائٹ ہاو¿س کے نائب پریس سیکریٹری کش دیشائی نے ایک بیان میں کہا کہ غیر منتخب ججز کیلئے یہ فیصلہ کرنا کہ قومی ایمرجنسی کو کیسے حل کیا جائے درست نہیں ہے۔

ان کا مزید کہنا تھا کہ صدر ٹرمپ نے امریکہ کو پہلے رکھنے کا عہد کیا تھا، اور انتظامیہ ہر ممکن طاقت کو استعمال کرنے کیلئے پرعزم ہے تاکہ اس بحران کا حل نکالا جا سکے اور امریکی عظمت کو دوبارہ بحال کیا جا سکے۔خیال رہے کہ اس سے قبل 3اپریل کو امریکی صدر ڈونلڈ ٹرمپ نے پاکستان سمیت دنیا کے کئی ممالک پر بھاری ٹیکس عائد کرنے کا اعلان کردیاتھا۔

امریکی صدر نے وائٹ ہاو¿س میںمنعقدہ تقریب میں یوم آزادی کے موقع پر یورپی یونین اور 46 ممالک پر نئے تجارتی محصولات کے نفاذ کا اعلان کیاتھا۔امریکی صدر نے پاکستان پر 29 فیصد جوابی ٹیرف لگانے کا اعلان کیا تھاان کاکہنا تھا کہ پاکستان ہم سے 58 فیصد ٹیرف چارج کرتا تھا۔ امریکہ بھارت پر 26، چین پر 34، یورپی یونین پر 20 فیصد ٹیرف عائد کرے گا۔ سعودی عرب، قطر اور افغانستان پر دس، دس فیصد ٹیرف عائد ہو گا۔

اس کے ساتھ ساتھ امریکی صدر ڈونلڈ ٹرمپ کاکہنا تھا کہ بنگلا دیش پر37، جاپان پر 24، اسرائیل پر 17 اور برطانیہ پر 10 فیصد ٹیرف عائد کریں گے۔ گاڑیوں کی درآمد پر 25 فیصد اضافی ٹیکس عائد کریں گے۔امریکی صدر ٹرمپ نے وائٹ ہاو¿س میں جوابی ٹیرف کے ایگزیکٹو آرڈر پر دستخط کئے اور خطاب میں کہا تھاکہ جوابی ٹیرف کا نفاذ امریکا کیلئے اچھا ہوگا۔ آج کا دن امریکی تاریخ کے اہم دنوں میں سے ایک تھا۔

امریکی صدر ٹرمپ نے یہ بھی کہا تھاکہ ان اقدامات کے ذریعے امریکہ ایک نئے سنہری دور کا آغاز کرے گا اور اب وقت آگیا تھا کہ امریکہ کو اقتصادی طور پر خوشحال بنایا جائے۔ڈونلڈٹرمپ کا یہ بھی کہنا تھا کہ ان کا کہنا تھاکہ آج ہماری اقتصادی آزادی کا دن ہے۔ ٹیرف سے حاصل رقم اپنے قرضوں کی ادائیگی کیلئے استعمال کریں گے۔کئی برسوں امریکی شہریوں کو سائیڈ لائن رکھا گیاتھا۔

دوسری قومیں طاقتوربن گئیں۔ اب امریکہ کی خوشحالی کی باری ہے اور اضافی ٹیرف عائد کرنے سے مضبوط مسابقت اور اشیاکی قیمتیں کم ہوں گی اس رقم کواپنے ٹیکسوں کو کم کرنے کیلئے استعمال کریں گے۔ ٹرمپ کے مطابق ان نئے ٹیرف کی مدد سے امریکہ میں غیر منصفانہ تجارتی تعلقات کو ختم کیا جائے گا۔ خاص طور پر ان ممالک کے ساتھ جنہوں نے امریکی صنعتوں کو نقصان پہنچایا ہے۔جوابی ٹیرف کا نفاذ امریکا کیلئے اچھا ہو گا۔