Live Updates

اگر واقعی پاکستا ن نے رافیل طیارے مار گرائے تو یہ دو دہائیوں کی آپریشنل سروس کا پہلا واقعہ ہوگا، فرانسیسی فوج کا پہلا ردعمل سامنے آگیا

فرانس اس لڑائی کے تجربے سے زیادہ سے زیادہ سیکھنے کا خواہاں ہے، اس لڑائی میں سینکڑوں طیاروں نے حصہ لیا، واقعے کی تفصیلات ابھی غیر یقینی ہیں اور بہت سے پہلو تصدیق طلب ہیں، ترجمان فرانسیسی فوج کی پریس بریفنگ

فیصل علوی جمعرات 29 مئی 2025 11:15

فرانس(اردوپوائنٹ اخبار تازہ ترین۔29 مئی 2025)اگر واقعی پاکستا ن نے رافیل طیارے مار گرائے تو یہ دو دہائیوں کی آپریشنل سروس کا پہلا واقعہ ہوگا، فرانسیسی فوج کا پہلا ردعمل سامنے آگیا، اس لڑائی میں سینکڑوں طیاروں نے حصہ لیا، فرانس اس لڑائی کے تجربے سے زیادہ سے زیادہ سیکھنے کا خواہاں ہے،عالمی خبررساں ادارے کے مطابق پاک بھارت جنگ میں پاک فضائیہ کے ہاتھوں فرانس کے جدید لڑاکا طیارے رافیل کی تباہی پر فرانسیسی فوج کے ترجمان نے پریس بریفنگ کے دوران کہا کہ رافیل کی کارکردگی کے حوالے سے صورتحال کا بغور جائزہ لینے کیلئے بھارت سے براہ راست معلومات حاصل کرنے کی کوشش کر رہے ہیں۔

صحافی کے پاک بھارت جنگ میں رافیل کی تباہی کے حوالے سے پوچھے گئے سوال پر فرانسیسی فوج کے ترجمان کا کہنا تھا کہ واقعے کی تفصیلات ابھی غیر یقینی ہیں اور بہت سے پہلو تصدیق طلب ہیں۔

(جاری ہے)

ترجمان فرانسیسی فوج کا کہنا تھا کہ لڑائی میں بہت سے طیاروں نے حصہ لیا تھا اس لئے بہت سے پہلوﺅں کی تصدیق ہونا باقی ہے۔ ترجمان کا کہنا تھا کہ رپورٹس کے مطابق اس لڑائی میں سیکڑوں طیاروں نے حصہ لیا فرانس اس لڑائی کے تجربے سے زیادہ سے زیادہ سیکھنے کا خواہاں ہے۔

اگر رافیل کے مار گرائے جانے کی رپورٹس درست ثابت ہوئیں تو یہ اس جہاز کے دو دہائیوں کی آپریشنل سروس کے دوران پہلا واقعہ ہوگا۔خیال رہے کہ پاکستان نے7 مئی کو بھارت کی جانب سے پاکستانی سرزمین پر جارحیت جواب میں بھارت کے 7 طیارے مار گرائے تھے جن میں 3 رافیل بھی شامل تھے۔فضاﺅں میں حکمرانی کرنے والے پاک وطن کے بہادر سپوتوں ;نے بھارت کے فرانسیسی ساختہ رافیل طیاروں کو تباہ کردیاتھا۔

آغاز میں بھارت اس عبرتناک شکست اور ہزیمت انگیز نقصان پر انکاری رہا تھالیکن ایک پریس بریفنگ میں بریفنگ میں بھارتی فضائیہ کے ائیر مارشل اے نے ڈھکے چھپے لفظوں اعتراف کرلیا تھا۔ 9 مئی کو ایک بریفنگ میں رافیل طیارے کے نقصان کے بارے میں ایک سوال کے جواب میں بھارتی فضائیہ کے ائیر مارشل اے کے بھارتی کاکہناتھا کہ نقصانات لڑائی کا حصہ ہوتے ہیں اور میں اس سے زیادہ تفصیل نہیں بتاسکتا اس سے فریق مخالف کو فائدہ ہوتا ہے۔

عالمی میڈیا پاک فضائیہ کے ہاتھوں رافیل جیسے جدید طیاروں کی تباہی کو بھارت کیلئے ذلت آمیز شکست قرار دے چکا تھا۔عسکری ماہرین کے مطابق پاکستان نے پہلی بار رافیل جیسے جدید طیاروں کو گرا کر بھارت پر اپنی فضائی برتری ثابت کردی تھی۔بھارت نے 2019 میں پاکستان کے ہاتھوں اپنے 2 طیاروں کی تباہی کے بعد فرانس سے 36 رافیل طیارے خریدے تھے جن میں سے 3 پاکستان نے حالیہ جنگ میں تباہ کردئیے تھے۔