ملک بھر میں انسداد اسمگلنگ آپریشنز میں ایک کروڑ 70 لاکھ کی منشیات برآمد

راولپنڈی(اُردو پوائنٹ اخبارتازہ ترین - این این آئی۔ 29 مئی2025ء)اے این ایف نے ملک بھر میں کارروائیاں کرتے ہوئے ایک کروڑ 70 لاکھ روپے کی منشیات برآمد کرلی۔ترجمان کے مطابق اینٹی نارکوٹکس فورس (اے این ایف) نے ملک کے مختلف شہروں اور تعلیمی اداروں کے اطراف منشیات اسمگلنگ کے خلاف کامیاب کریک ڈاؤن کرتے ہوئے 7 مختلف کارروائیوں کے دوران ایک نائیجیرین شہری سمیت 8 ملزمان کو گرفتار کر لیا ہے۔

ان کارروائیوں میں مجموعی طور پر 103.872 کلوگرام منشیات برآمد ہوئی ہیں، جن کی مالیت ایک کروڑ 70 لاکھ روپے سے زائد بتائی گئی ہے۔انسداد منشیات فورس نے جامعات کے اطراف میں بھی خاص طور پر کارروائیاں کیں۔ جام شورو، سندھ میں ایک یونیورسٹی کے قریب کھڑی گاڑی سے 6 کلوگرام چرس برآمد کی گئی، جبکہ موقع سے ایک ملزم کو گرفتار کیا گیا۔

(جاری ہے)

ابتدائی تفتیش کے دوران ملزم نے انکشاف کیا کہ وہ یہ منشیات تعلیمی ادارے کے طلبا کو فروخت کرتا تھا۔

بین الاقوامی اسمگلنگ کی روک تھام میں بھی اے این ایف کو اہم کامیابیاں حاصل ہوئیں۔ ملتان ایئرپورٹ پر قطر سے آنے والے نائیجیرین شہری کے پیٹ سے 672 گرام کوکین کے 56 کیپسول برآمد کیے گئے۔ اسی طرح لاہور ایئرپورٹ پر قطر کے راستے اسپین جانے والے مسافر کے سامان میں موجود کپڑوں میں جذب 14.325 کلوگرام مشکوک منشیات برآمد ہوئیں۔دونوں افراد کو گرفتار کر کے تحقیقات کا آغاز کر دیا گیا ہے۔

پشاور کے ورسک روڈ پر واقع ایک کوریئر آفس میں اے این ایف نے کارروائی کرتے ہوئے 4پارسلز سے منشیات برآمد کیں۔ پارسلز میں سولر انورٹرز کے اندر چھپائی گئی 6 کلو چرس اور 1.2 کلو افیون شامل تھیں، جو ملک کے مختلف شہروں کو بھیجی جا رہی تھیں۔شرقپور روڈ، تحصیل فیروزوالہ، ضلع شیخوپورہ میں بھی بڑی کارروائی کرتے ہوئے ملزمان سے 60 کلوگرام چرس، 3 کلو آئس، 3 کلو ہیروئن اور 14.4 کلو افیون برآمد کی گئی۔

نیشنل ہائی وے پر حیدرآباد میں ایک ریسٹورنٹ کے قریب گاڑی سے 6 کلو چرس برآمد ہوئی جب کہ کراچی کے علاقے ناتھا خان گوٹھ، ملیر کے قریب موٹر سائیکل سوار 2 افراد سے 3.6 کلوگرام چرس ضبط کی گئی۔ترجمان اے این ایف کے مطابق تمام گرفتار ملزمان کے خلاف انسداد منشیات ایکٹ کے تحت مقدمات درج کر لیے گئے ہیں اور تحقیقات کا دائرہ وسیع کر دیا گیا ہے۔ انسداد منشیات فورس کا کہنا ہے کہ تعلیمی اداروں اور شہری آبادیوں کو نشے کے ناسور سے محفوظ رکھنے کے لیے کریک ڈاؤن کا سلسلہ جاری