چوہدری شافع حسین کا تین روزہ پلاسٹک اینڈ پیکنگ انڈسٹری کی نمائش کا افتتاح،سٹالز کا معائنہ کیا

لاہور (اُردو پوائنٹ اخبارتازہ ترین - اے پی پی۔ 29 مئی2025ء) صوبائی وزیر صنعت و تجارت چوہدری شافع حسین نے تین روزہ 20ویں پلاسٹک اینڈ پیکنگ انڈسٹری کی نمائش کا افتتاح کیا۔ایکسپو سینٹر جوہر ٹاون میں تین روزہ نمائش 29مئی سے 31مئی تک جاری رہے گی،صوبائی وزیر نے ایکسپو سینٹر لاہور میں نمائش کے افتتاح کے بعد سٹالز کا معائنہ کیا۔نمائش میں 30ممالک سے پلاسٹک اینڈ پیکنگ انڈسٹری سے وابستہ 200سے زائد کمپنیوں کے نمائندوں نے شرکت کی۔

چوہدری شافع حسین نے نمائش کے افتتاح کے بعد میڈیا سے گفتگو کرتے ہوئے کہا کہ انڈسٹری اسٹیٹس کے حوالے سے نئی پالیسی لائی جارہی ہے۔وزیر اعلی پنجاب کی منظوری کے بعد پالیسی نافذ العمل ہوگی۔نئی پالیسی کے مطابق صنعتکاری کے فروغ کیلئے انڈسٹریل اسٹیٹس میں پلاٹوں کی قیمتیں کم کی جائیں گی۔

(جاری ہے)

صوبائی وزیر نے کہا کہ انڈسٹریل اسٹیٹس میں پراپرٹی کا کاروبار کرنے والے لینڈ مافیا کا خاتمہ کردیا اب انڈسٹریل اسٹیٹ میں 2سال کے اندر فیکٹری نہ لگانے والے کا پلاٹ کینسل ہوگا۔

چوہدری شافع حسین نے بتایا کہ چین کے حالیہ دورے کے دوران بڑے سرمایہ کار گروپوں سے پنجاب میں سرمایہ کاری کے حوالے سے معاہدے ہوئے ہیں۔چین کی وی وو موبائل کمپنی کا انڈسٹریل اسٹیٹ فیصل آباد میں پلانٹ لگ رہا ہے اور آئندہ ڈیڑھ سال میں پنجاب میں وی وو موبائل فون بننا شروع ہو جائیں گے۔صوبائی وزیر نے کہا کہ پنجاب میں نئی سرمایہ کاری لانا میرا عزم ہے نئے کارخانے لگیں گے تو روزگار کے نئے مواقع پیدا ہوں گے۔

انہوں نے کہا کہ موسمیاتی تبدیلیوں کے اثرات سے محفوظ رہنے کیلئے شجر کاری کا فروغ ضروری ہے۔ وزیر اعلی مریم نواز کی قیادت میں پنجاب حکومت شجر کاری کے فروغ پر کام کر رہی ہے۔ نگران حکومت سے پہلے کی حکومت کا بلین ٹری پراجیکٹ کہیں نظر نہیں آتا اور یہ بلین ٹری پراجیکٹ صرف کاغذوں میں موجود ہے۔انہوں نے کہا کہ الیکٹرک وہیکلز سیکٹر کا فروغ حکومت کی پہلی ترجیح ہے کوشش ہے کہ الیکٹرک وہیکلز مینوفیکچرنگ کے کارخانے پنجاب میں لگیں۔

صوبائی وزیر صنعت و تجارت نے کہا کہ غیر ملکی کمپنیاں پنجاب میں سرمایہ کاری کو ترجیح دے رہی ہیں چین کی کمپنی پنجاب میں لیتھیئم بیٹریوں کا کارخانہ لگائے گی۔انہوںنے کہا کہ پاکستان پیکجنگ انڈسٹری میں کافی آگے نکل چکا ہے اور پیکجنگ انڈسٹری سے وابستہ بہت سی غیر ملکی کمپنیاں پنجاب میں سرمایہ کاری کرنا چاہتی ہیں۔انہوں نے نمائش کے منتظمین کو نمائش کے کامیابانعقاد پر مبارکباد دی اور منتظمین اور صنعتکاروں میں شیلڈز تقسیم کیں۔ایوان صنعت و تجارت لاہور کے صدر ابو ذرشاد،، ریجنل چیئرمن وفاقی ایوان صنعت و تجارت،،ایم ڈی پیگاسس عامر خانزادہ اور صنعتکاروں کی کثیر تعداد نمائش میں موجود تھی۔ پنجاب چائنا ڈیسک آف سی ایم کے سربراہ جلال حسن خان بھی موجود تھے۔