Live Updates

خواتین چیمبر آف کامرس راولپنڈی کی معاونِ خصوصی ہارون اختر خان سے اہم ملاقات

جمعہ 30 مئی 2025 13:36

اسلام آباد (اُردو پوائنٹ اخبارتازہ ترین - اے پی پی۔ 30 مئی2025ء) وزیراعظم کے معاونِ خصوصی برائے صنعت و پیداوار ہارون اختر خان سے خواتین چیمبر آف کامرس راولپنڈی کے وفد نے ملاقات کی۔ ملاقات میں خواتین کی معاشی بااختیاری، چیمبر کی جگہ کی فراہمی، خواتین کے لیے ایکسپو حب کے قیام اور ہنر مندی کی ترقی سے متعلق اہم امور پر گفتگو کی گئی۔ہارون اختر خان نے گفتگو کے دوران کہا کہ پاکستان کی معیشت خواتین کی بااختیاری کے بغیر ترقی نہیں کر سکتی۔

" انہوں نے کہا کہ وزیراعظم شہباز شریف کی قیادت میں حکومت خواتین کو قومی ترقی میں فعال کردار دینے کے لیے پرعزم ہے، اور ان کی پالیسیوں میں ہمیشہ خواتین کی شمولیت کو ترجیح دی گئی ہے۔معاونِ خصوصی نے کہا کہ وزارتِ صنعت و پیداوار خواتین کی مہارتوں کو اپ گریڈ کرنے اور نئی اسکلز سکھانے کے عمل میں مکمل معاونت فراہم کرے گی۔

(جاری ہے)

انہوں نے کہا کہ سمیڈا ،توسدیک اور پیٹیک جیسے ادارے خواتین کی ہنر مندی بڑھانے کے لیے سرگرم کردار ادا کریں گے۔

خواتین چیمبر آف کامرس راولپنڈی نے آزاد جموں و کشمیر میں خواتین کے لیے ایک نیا مرکز قائم کرنے کا اعلان بھی کیا، جسے معاونِ خصوصی نے سراہا اور اس کے لیے وزارت کی مکمل حمایت کی یقین دہانی کرائی۔ہارون اختر خان نے متعلقہ اداروں کو ہدایت جاری کی کہ وہ خواتین چیمبر آف کامرس کے ساتھ فوری طور پر اسکل ڈویلپمنٹ پروگرامز کے سلسلے میں ملاقاتیں کریں اور عملی اقدامات کو یقینی بنائیں۔ انہوں نے کہاکہ مجھے خواتین چیمبر آف کامرس کے ساتھ ہونے والی اسکل ڈویلپمنٹ سرگرمیوں کی پیش رفت پر باقاعدہ رپورٹ دی جائے۔یہ ملاقات خواتین کی اقتصادی شرکت اور خودمختاری کے لیے حکومتی عزم کا مظہر ہے اور اس کے نتیجے میں خواتین کے لیے نئی راہیں کھلنے کی توقع ہے۔