یورپی یونین کے وفد کا وزارت انسانی حقوق کا دورہ، وفاقی سیکرٹری انسانی حقوق سے ملاقات

اسلام آباد (اُردو پوائنٹ اخبارتازہ ترین - اے پی پی۔ 30 مئی2025ء) پاکستان میں یورپی یونین کے ہیڈ آف کوآپریشن جیرون ولیمز کی قیادت میں یورپی یونین (ای یو) کے ایک وفد نے پروگرام مینجر برائے انسانی حقوق و جمہوریت مارٹا شمزک کے ہمراہ وزارت انسانی حقوق کا دورہ کیا اور وفاقی سیکرٹری برائے انسانی حقوق حمیرہ احمد سے ملاقات کی۔ اس موقع پر وزارت کے ڈائریکٹر جنرل (بین الاقوامی تعاون)  محمد ارشد اور ڈائریکٹر (بین الاقوامی تعاون) محمد عارف لغاری بھی موجود تھے۔

جمعہ کو وزارت انسانی حقوق سے جاری پریس ریلیز کے مطابق وفاقی سیکرٹری نے یورپی یونین کے وفد کو خوش آمدید کہا اور پاکستان میں انسانی حقوق کے فروغ کے لیے یورپی یونین کی دیرینہ شراکت کو سراہا۔ جیرون ولیمز نے پاکستان کی جانب سے انسانی حقوق کے شعبے میں ہونے والی پیش رفت کو تسلیم کرتے ہوئے یورپی یونین کی جاری حمایت کا اعادہ کیا۔

(جاری ہے)

ملاقات میں متوقع جی ایس پی+ مانیٹرنگ مشن پر تبادلہ خیال کیا گیا جس کے فوائد کا براہ راست تعلق انسانی حقوق کے تسلسل کے ساتھ بہتری سے جوڑا گیا۔

ولیمز نے اقلیتوں، خواتین، بچوں اور معذور افراد کے حقوق کے تحفظ کو اجاگر کیا اور پاکستان کی کاوشوں کو سراہتے ہوئے تعاون کو جاری رکھنے پر زور دیا۔وفاقی سیکرٹری حمیرہ احمد نے حکومت پاکستان کی جانب سے انسانی حقوق کے تحفظ اور کمزور طبقات کی فلاح کے لیے مضبوط عزم کا اعادہ کیا۔ انہوں نے وفد کو قومی کمیشن برائے اقلیتوں کے قیام اور آئی سی ٹی چائلڈ میریج ریسٹرینٹ ایکٹ 2025 جیسے حالیہ قانون سازی کے اقدامات سے آگاہ کیا۔

انہوں نے وزیر اعظم پاکستان کے ویمن ایمپاورمنٹ پیکیج 2024 کو صنفی برابری کے فروغ کے لیے ایک کلیدی اقدام قرار دیا۔ معذور افراد کی شمولیت اور آسان نقل و حرکت کے لیے جاری اصلاحات کا بھی ذکر کیا گیا۔ مزید برآں وفاقی سیکرٹری نے قومی کمیشن برائے انسانی حقوق (این سی ایچ آر)، قومی کمیشن برائے خواتین (این سی ایس ڈبلیو) اور قومی کمیشن برائے حقوقِ اطفال (ان سی آر سی) کو پیرس اصولوں کے مطابق موثر بنانے کے لیے حکومت کے عزم کا اظہار کیا۔

دوران ملاقات یورپی یونین اور حکومتِ پاکستان کے درمیان "حقوق پاکستان دوم" (Huqooq-e-Pakistan II - HeP-II) پروگرام کے تحت جاری تعاون پر بھی گفتگو ہوئی۔ دونوں فریقین نے 2025 کے سالانہ ورک پلان پر موثر عملدرآمد کے لیے تمام متعلقہ اسٹیک ہولڈرز کے درمیان مضبوط ہم آہنگی کی ضرورت پر زور دیا۔یہ ملاقات ایک مثبت ماحول میں اختتام پذیر ہوئی جس میں دونوں فریقین نے انسانی حقوق کے تحفظ سے متعلق اپنے مشترکہ عزم کا اعادہ کیا اور پاکستان میں انسانی حقوق کے فروغ کے لیے وزارت انسانی حقوق کے مرکزی کردار کو تسلیم کیا۔ ملاقات میں مستقل روابط اور مربوط مشاورت کی اہمیت پر بھی زور دیا گیا۔