مہنگائی میں کمی کے دعووں کے باوجود خوراک کی قیمتوں میں مزید اضافہ

عید الاضحٰی سے قبل، پیاز، آلو، ٹماٹر، دالوں سمیت 14 اشیاء کی قیمتوں میں اضافہ ہو گیا

محمد علی جمعہ 30 مئی 2025 20:54

لاہور (اُردو پوائنٹ اخبارتازہ ترین۔ 30 مئی2025ء) مہنگائی میں کمی کے دعووں کے باوجود خوراک کی قیمتوں میں مزید اضافہ، عید الاضحٰی سے قبل، پیاز، آلو، ٹماٹر، دالوں سمیت 14 اشیاء کی قیمتوں میں اضافہ ہو گیا۔ تفصیلات کے مطابق ملک بھر میں مہنگائی میں اضافے کی رفتار میں کمی کے حکومتی دعوؤں کے باوجود گزشتہ ایک ہفتے کے دوران صرف 10 اشیا سستی جبکہ 14 اشیا مہنگی ہوگئی۔

وفاقی ادارہ شماریات کی جانب سے جاری مہنگائی کی ہفتہ وار رپورٹ میں بتایا گیا کہ حالیہ ایک ہفتے کے دوران ٹماٹر 4.54 فیصد، آلو 2.94 اور انڈے 2.19 فیصد مہنگے ہوئے، پیاز، گڑ، کیلے، دال ماش، دال چنا اور سگریٹس بھی مہنگی ہونے والی اشیا میں شامل ہیں۔ رپورٹ کے مطابق گزشتہ ہفتے چکن 8.51 فیصد، چینی 0.25 اور خشک دودھ 0.20 فیصد سستا ہوا۔

(جاری ہے)

وفاقی ادارہ شماریات کے مطابق گھی، گندم کا آٹا، چاول، لہسن، دال مونگ، بجلی اور ایل پی جی بھی سستی ہونے والی اشیا میں شامل ہیں۔

اعدادوشمار میں بتایا گیا کہ حالیہ ہفتے کے دوران حساس قیمتوں کے اعشاریے کے لحاظ سے سالانہ بنیادوں پر 17 ہزار 732روپے ماہانہ تک آمدنی رکھنے والے طبقے کے لیے مہنگائی میں اضافے کی رفتار0.97 فیصد کمی کے ساتھ 0.22 فیصد، 17 ہزار 733روپے سے 22 ہزار 888روپے ماہانہ تک آمدنی رکھنے والے طبقے کے لیے مہنگائی میں اضافے کی رفتار 0.95 فیصدکمی کے ساتھ 1.04 فیصد اور 22 ہزار 889روپے سے 29 ہزار 517 روپے ماہانہ تک آمدنی رکھنے والے طبقے کے لیےمہنگائی میں اضافے کی رفتار0.69 فیصدکمی کے ساتھ0.26فیصد ریکارڈ کی گئی۔

وفاقی ادارہ شماریات نے بتایا کہ 29 ہزار 518 روپے سے 44ہزار 175 روپے ماہانہ تک آمدنی رکھنے والے طبقے کے لیے مہنگائی میں اضافے کی رفتار0.63فیصد کمی کے ساتھ 1.13فیصد رہی اور44 ہزار 176روپے ماہانہ سے زائد آمدنی رکھنے والے طبقے کے لیے مہنگائی میں اضافے کی رفتار 0.74 فیصد کمی کے ساتھ 1.50فیصد رہی ہے۔