محمد حنیف عباسی کا ریلوے مسافروں کیلئے خدمات اور سہولیات میں بہتری پر زور

ہفتہ 31 مئی 2025 20:10

اسلام آباد (اُردو پوائنٹ اخبارتازہ ترین - این این آئی۔ 31 مئی2025ء)وفاقی وزیر ریلوے محمد حنیف عباسی نے ریلوے مسافروں کیلئے خدمات اور سہولیات میں بہتری، اضافہ اور خدمات کے مجموعی معیار کو بلند کرنے کی اہمیت پر زور دیا ہے۔پاکستان ریلویز کے جاری اور آنے والے ترقیاتی منصوبوں کے اعلیٰ سطحی جائزہ اجلاس کی ہفتہ کو صدارت کرتے ہوئے انہوں نے محکمے کے تمام شعبوں میں کارکردگی کے فروغ کے لیے متعدد اسٹریٹجک اقدامات کی منظوری دی۔

اجلاس میں ملک بھر کے ڈویڑنل سپرنٹنڈنٹس نے آن لائن شرکت کی۔ وفاقی وزیر نے شفافیت، بروقت تکمیل اور واضح اہداف متعین کرنے پر بھرپور زور دیا۔ اجلاس کے دوران ریلوے کے جاری مختلف اقدامات پر تفصیلی پیش رفت رپورٹ پیش کی گئی۔محمد حنیف عباسی نے تمام ترقیاتی کاموں کو جلد مکمل کرنے کی ہدایت کی۔

(جاری ہے)

وفاقی وزیر نے عوام کو موثر، قابل اعتماد اور اعلیٰ معیار کی ٹرانسپورٹ خدمات فراہم کرنے کے لییادارے کے عزم کا اعادہ کیا۔

اس موقع پر ریلوے کے انفراسٹرکچر کو جدید ٹیکنالوجی کے ساتھ اپ گریڈ کرنے کے منصوبوں پر بھی تبادلہ خیال کیا گیا۔ملازمین کی کارکردگی کو بہتر بنانے اور آپریشنل کارکردگی کو بہتر بنانے کے لیے نئے منصوبوں کے لیے منظوری دی گئی۔محمد حنیف عباسی نے ریلوے کالونیوں کے اندر ماحولیاتی اور صفائی ستھرائی کی بہتری کی ضرورت پر زور دیا۔انہوں نے اہم مسائل کے فوری حل پر زور دیا اور مستقبل کی پیش رفت کی رہنمائی کے لیے ایک مضبوط، طویل مدتی اسٹریٹجک فریم ورک کا خاکہ بھی پیش کیا۔اجلاس کے اختتام پر پاکستان ریلوے کو نئی بلندیوں تک پہنچانے کے لیے ہر سطح پر اتحاد اور ٹیم ورک کے عزم کا اعادہ کیا گیا۔