تین سال چھ ماہ میں 875 کشمیریوں کو شہید 2400 کو زخمی کردیاگیا

مظفرآباد(اُردو پوائنٹ اخبارتازہ ترین - این این آئی۔ 02 جون2025ء) صرف تین سال چھ ماہ کے اندر 875 کشمیریوں کو شہید 2400 کو زخمی اور 24 ہزار کو گرفتار کر کے بھارتی حکومت نے دنیا کے امن کو سبوتاژ کرنے کی سازش کی ہے۔ بھارت میں کشمیریوں کو تحریک آزادی سے دور رکھنے کے لیے مقبوضہ علاقے میں خوف و دہشت کا ماحول قائم کر رکھا گیا ہے۔ اس مقصد کے لیے 10 لاکھ فوجی تعینات کیے گئے ہیں۔

غیر قانونی بھارتی قبضے کی وجہ سے کشمیری شدید مشکلات کا شکار ہیں۔ حق خود ارادیت کے بغیر خطہ میں دیر پا امن و سلامتی کا قیام ناممکن ہے۔ عالمی برادری انسانی حقوق کی پامالی قتل و غارتگری اور مظالم کا فوری نوٹس لیں۔ ان خیالات کا اظہار سابق امیدوار اسمبلی ویلی 03 عثمان ظفر کاشمیری ایڈووکیٹ نے گزشتہ روز میڈیا سے گفتگو کرتے ہوئے کیا۔

(جاری ہے)

عثمان ظفر کاشمیری ایڈووکیٹ نے کہا کہ ریاستی اعلی تعلیم یافتہ پڑھے لکھے ہنر مند یوتھ کو پاؤں پر کھڑا کرنے کا تہیہ کر رکھا ہے۔

ہر سال ہزاروں کی تعداد میں نوجوانوں کا ملک کو خیرباد کہہ دینا باعث تشویش ہے۔یوتھ کو بے روزگاری کے عفریت سے بچانے کے لیے ریاستی پراجیکٹس میں ریاست ہی کے نوجوانوں کو مواقع فراہم کر کے ریاست کا پیسہ ریاست ہی میں خرچ کرنے کے لیے کوشاں ہیں۔عثمان ظفر کاشمیری ایڈووکیٹ کا کہنا تھا کہ ریاست کی مٹی کا ہم پر قرض ہے اس قرض کی ادائیگی کے لیے زندگی بھر کی جمع پونجی ریاستی تعمیر و ترقی کے کاموں میں لگا رہے ہیں۔

ان کا کہنا تھا کہ کشمیر کے نام پر سیاست کرنے والے آئے روز ایسی عامیانہ گفتگو کرتے ہیں جس سے ریاست کا سر ہی شرم سے جھک جاتا ہے۔ ایسے لوگوں کو عوام کے ووٹ کا استحصال کرنا زیب نہیں دیتا۔ انہوں نے اداروں اور حکومت آزاد کشمیر سے مطالبہ کیا ہے کہ ویلی 03 کے مہاجرین سے ووٹ لے کر مہاجرین ہی کو غیر مہاجر کہنے والے وزیر حکومت کی باتوں کا نوٹس لیتے ہوئے مجھ سمیت جن لوگوں کے بارے میں انہوں نے ہرزہ سرائی کی ہے اس کا ریکارڈ منظر عام پر لایا جائے۔

جھوٹ اور سچ کا پتہ لگایا جائے۔ مہاجرین کے نام پر گلچھڑے اڑانے والوں کو روکنا اب مہاجرین ہی کی ذمہ داری بنتی ہے۔عثمان ظفر کاشمیری کا کہنا تھا کہ ہمارا حال ماضی سب کے سامنے کھلی کتاب کی مانند ہے ہمیں یہ ثابت کرنے کی ضرورت ہی نہیں کہ ہم مہاجر ہیں یا کوئی اور۔ ہم ریاست سے محبت رکھتے ہیں۔ ریاستی ہنر مندوں، اعلی تعلیم یافتہ تربیت یافتہ یوتھ کو پاؤں پر کھڑا کرنے کا خواب دیکھ رکھا ہے جس کی تعبیر حاصل کرنے کے لیے اپنے دن رات صرف کر رہے ہیں۔