انفارمیشن آفیسرز ایسوسی ایشن کا نئے ڈائریکٹر جنرل اطلاعات انصار اللہ خلجی کی تعیناتی پر خیرمقدم اور مبارکباد

پشاور (اُردو پوائنٹ اخبارتازہ ترین - اے پی پی۔ 02 جون2025ء) انفارمیشن آفیسرز ایسوسی ایشن نے سینئر افسر انصار اللہ خلجی کو ڈائریکٹر جنرل اطلاعات مقرر کیے جانے پر دلی مبارکباد پیش کی ہے۔ ایسوسی ایشن نے ان کی تقرری کو محکمے کی بہتری کے لیے ایک اہم پیش رفت اور قابل تقلید مثال قرار دیا ہے۔انصار خلجی ڈائریکٹوریٹ جنرل اطلاعات کے ایک تجربہ کار، باصلاحیت اور اعلیٰ نظم و نسق کے حامل سینئر افسر ہیں جنہوں نے اپنے کیریئر کے دوران مختلف اہم عہدوں پر ذمہ داریاں بخوبی نبھائیں۔

وہ اس سے قبل پریس رجسٹرار، اسٹیشن ڈائریکٹر پختونخوا ریڈیو، اور ڈائریکٹر ایڈمن جیسے کلیدی عہدوں پر خدمات انجام دے چکے ہیں۔ ان کی سربراہی میں محکمہ اطلاعات کی کارکردگی اور انتظامی ڈھانچے میں نمایاں بہتری دیکھی گئی۔

(جاری ہے)

انصار خلجی نے نہ صرف محکمہ اطلاعات بلکہ کئی قومی اور بین الاقوامی اداروں میں بھی اہم ذمہ داریاں سرانجام دی ہیں۔ وہ پشاور یونیورسٹی سے امتیازی حیثیت میں جرنلزم کی ڈگری حاصل کرنے کے بعد کئی سالوں تک انگریزی صحافت سے بھی وابستہ رہے۔

اردو، پشتو اور انگریزی تینوں زبانوں میں مہارت رکھنے والے انصار خلجی کے ہزاروں مضامین مختلف اخبارات میں شائع ہو چکے ہیں۔انہوں نے محکمہ اطلاعات میں صوبہ بھر میں پہلی پوزیشن حاصل کرتے ہوئے بطور اسسٹنٹ ڈائریکٹر شمولیت اختیار کی۔ انصار خلجی عالمی بینک، یونیسف، یو ایس ایڈ جیسے اداروں میں بطور کمیونیکیشن کنسلٹنٹ بھی خدمات انجام دے چکے ہیں۔

وہ محکمہ اطلاعات کے پہلے افسر ہیں جنہوں نے بیرونِ ملک نہ صرف پاکستان کی نمائندگی کی بلکہ اپنی بہترین کارکردگی سے ملک کا نام بھی روشن کیا۔ انہوں نے چین، امریکہ اور افریقہ کے ممتاز اداروں سے مختلف تربیتی کورسز بھی کامیابی سے مکمل کیے۔اس موقع پر انفارمیشن آفیسرز ایسوسی ایشن کے صدر نے اپنے بیان میں کہا کہ انصار خلجی کی بطور ڈائریکٹر جنرل تقرری ادارے کے لیے نہایت خوش آئند ہے۔

ان کی وسیع پیشہ ورانہ تجربہ کاری، قائدانہ صلاحیتیں اور بصیرت محکمہ اطلاعات کے لیے ایک قیمتی اثاثہ ہیں۔ ہمیں یقین ہے کہ ان کی قیادت میں محکمہ ترقی کی نئی راہوں پر گامزن ہوگا۔ایسوسی ایشن نے اس عزم کا اظہار کیا کہ وہ نو تعینات ڈائریکٹر جنرل انصار خلجی کی قیادت میں ادارے کی بہتری، پالیسیوں کے مؤثر نفاذ اور حکومتی بیانیے کو قومی سطح پر اجاگر کرنے کے لیے ہر ممکن تعاون فراہم کرتی رہے گی۔آخر میں، ایسوسی ایشن کے تمام اراکین نے انصار خلجی کی نئی ذمہ داریوں کے لیے نیک تمناؤں کا اظہار کرتے ہوئے دعا کی کہ اللہ تعالیٰ انہیں کامیابی، صحت اور استقامت عطا فرمائے تاکہ وہ صوبے کی خدمت مزید احسن انداز میں انجام دے سکیں۔