Live Updates

بلیو اکانومی، پاکستان کی ترقی کا نیا راستہ، سالانہ 100 ارب ڈالرآمدن کا امکان

منگل 3 جون 2025 20:01

اسلام آباد (اُردو پوائنٹ اخبارتازہ ترین - آن لائن۔ 03 جون2025ء)پاکستان کی معیشت کو پائیدار بنیادوں پر مستحکم کرنے اور روزگار کے نئے مواقع پیدا کرنے کے لیے بلیو اکانومی پر خصوصی توجہ دی جا رہی ہے۔ اسپیشل انویسٹمنٹ فیسیلیٹیشن کونسل ( ایس آئی ایف سی ) کی معاونت سے بلیو اکانومی پالیسی کی فوری تکمیل کی ہدایات جاری کر دی گئی ہیں۔ توقع ہے کہ بلیو اکانومی سے پاکستان کو سالانہ 100 ارب ڈالر تک آمدن حاصل ہو سکتی ہے۔

اس وقت پاکستان کی بحری معیشت کا جی ڈی پی میں حصہ صرف 0.4 فیصد تک محدود ہے، جو اس کے وسیع امکانات کے برعکس ہے۔ ماہی گیری، بحری سیاحت اور نقل و حمل کا بحری معیشت کی آمدن میں بنیادی کردار ہے۔ سی فوڈ کی برآمدات سے سالانہ 450 ملین ڈالر جبکہ بحری سیاحت سے 300 ملین ڈالر زرمبادلہ موصول ہوتا ہے۔

(جاری ہے)

تاہم، ماہی گیری، آبی زراعت، بحری سیاحت اور نقل و حمل میں مجموعی طور پر 34 ارب ڈالر سالانہ آمدن کی صلاحیت موجود ہے۔

وفاقی وزیر برائے بحری امور جنید چوہدری کا کہنا ہے کہ بلیو اکانومی صرف مستقبل کی نہیں، آج کی معاشی ترجیح ہے۔ ایس آئی ایف سی کے تعاون سے حکومت ملک کے معاشی استحکام کے لیے بھرپور کوششیں کر رہی ہے۔ بلیو اکانومی کو فروغ دینے سے نہ صرف ملکی معیشت کو تقویت ملے گی بلکہ ماحول کے تحفظ اور روزگار کی فراہمی کے بھی وسیع امکانات پیدا ہوں گے۔