Live Updates

شہباز حکومت ٹیکس ہدف حاصل کرنے میں ناکام

پاکستان کی 77 سالہ تاریخ میں پہلی مرتبہ ٹیکس شارٹ فال 1 ہزار ارب روپے سے تجاوز کر گیا

محمد علی منگل 3 جون 2025 20:02

لاہور ( اُردو پوائنٹ اخبارتازہ ترین۔ 03 جون 2025ء ) شہباز حکومت ٹیکس ہدف حاصل کرنے میں ناکام، پاکستان کی 77 سالہ تاریخ میں پہلی مرتبہ ٹیکس شارٹ فال 1 ہزار ارب روپے سے تجاوز کر گیا۔ تفصیلات کے مطابق پاکستان کی تاریخ میں پہلی مرتبہ کسی مالی سال کے دوران ٹیکس شارٹ فال 1 ہزار ارب روپے سے تجاوز کر گیا، جبکہ مالی سال کے اختتام میں ابھی مزید ایک مہینہ باقی ہے۔

میڈیا رپورٹس کے مطابق فیڈرل بورڈ آف ریونیو (ایف بی آر) کے لیے مالی سال 2024-25 کے اختتامی مہینے میں ریونیو اہداف کا حصول ایک بڑا چیلنج بن گیا ہے، کیونکہ مئی 2025 میں ٹیکس وصولیوں میں 206 ارب روپے کا نمایاں شارٹ فال سامنے آیا ہے۔ذرائع کے مطابق مئی میں ایف بی آر کا 1110 ارب روپے کا ہدف تھا، مگر صرف 904 ارب روپے ہی وصول کیے جا سکے ہیں۔

(جاری ہے)

جولائی 2024 سے مئی 2025 تک کے دوران محصولات میں مجموعی طور پر 1,027 ارب روپے کی کمی ریکارڈ کی گئی ہے۔

اس عرصے میں ایف بی آر نے 11,240 ارب روپے کے ہدف کے مقابلے میں صرف 10,213 ارب روپے ہی وصول کیے۔ اس طرح ٹیکس خسارہ، جو جولائی تا مارچ کے دوران 703 ارب روپے تھا، مئی کے اختتام پر بڑھ کر 1,027 ارب روپے تک پہنچ چکا ہے۔یہ صورت حال ایف بی آر اور وزارت خزانہ دونوں کے لیے باعث تشویش بن چکی ہے۔ ذرائع کے مطابق محصولات میں مسلسل کمی کے پیش نظر حکومت نے ایف بی آر کا سالانہ ٹیکس ہدف 12,913 ارب روپے سے کم کر کے 12,334 ارب روپے مقرر کیا، تاہم اس کے باوجود جون 2025 کے لیے مقررہ 2,121 ارب روپے کی وصولی ایک مشکل ہدف تصور کی جا رہی ہے۔

ٹیکس حکام کا کہنا ہے کہ جون میں ہدف کے حصول کے لیے تمام ممکنہ ذرائع بروئے کار لائے جا رہے ہیں، تاہم ادارے کو شدید دباؤ کا سامنا ہے۔ حکام نے عندیہ دیا ہے کہ موجودہ مالی سال کے آخر تک محصولات کا ہدف حاصل کرنے کے لیے غیر معمولی اقدامات کیے جائیں گے۔