Live Updates

پنجاب انسٹیٹیوٹ آف نیوروسائنسز لاہور میں 24گھنٹے ایم آر آئی کی سہولت دستیاب

سہولت کی بدولت پنجاب بھر سے آنے والے مریضوں کو فوری تشخیص کی سہولت میسر آئے گی‘ پروفیسر آصف بشیر

بدھ 4 جون 2025 17:13

لاہور(اُردو پوائنٹ اخبارتازہ ترین - این این آئی۔ 04 جون2025ء)پنجاب انسٹیٹیوٹ آف نیوروسائنسز لاہور میں مریضوں کے لیے 24 گھنٹے، ایم آر آئی سروسز کی فراہمی کا آغاز کر دیا گیا ۔ یہ اقدام وزیر اعلیٰ پنجاب مریم نواز شریف کے ویژن کے مطابق صحت کی بہترین سہولیات کی عوام تک رسائی کی جانب ایک اور سنگ میل ہے۔ایگزیکٹو ڈائریکٹر پنز پروفیسر آصف بشیر کا کہنا تھا کہ اس سہولت کی بدولت پنجاب بھر سے آنے والے مریضوں کو فوری تشخیص کی سہولت میسر آئے گی، یہ اقدام مریض کا علاج بلا تاخیر شروع کرنے میں مددگار ثابت ہو گا ۔

انہوں نے کہا کہ پاکستان کا پہلا پبلک سیکٹر ادارہ ہے جو تمام مریضوں کو بلا امتیاز چوبیس گھنٹے ایم آر آئی کی سہولت فراہم کر رہا ہے اور اب مریضوں کو ایم آر آئی جیسا مہنگا ٹیسٹ کروانے کیلئے نجی سیکٹر میں جانا نہیں پڑے گا۔

(جاری ہے)

پروفیسر آصف بشیر نے اس عزم کا اعادہ بھی کیا کہ نیورو انسٹی ٹیوٹ مستقبل میں بھی مریضوں کو اعلیٰ معیار کی طبی سہولیات اور تشخیصی خدمات فراہم کرتا رہے گا۔

انہوں نے کہا کہ پنز کے ہیلتھ کئیر پروفیشنلز مریضوں کو بہترین دیکھ بھال اور عالمی معیار کی تشخیص فراہم کرنے کے مشن پر کاربند ہیں۔پنجاب انسٹیٹیوٹ آف نیوروسائنسز کا یہ اقدام نہ صرف جدید طبی سہولیات کی فراہمی کی جانب ایک اہم پیش رفت ہے بلکہ صحت کے شعبے میں حکومتی وژن کی عملی تعبیر بھی ہے۔انہوں نے کہا کہ پنجاب حکومت کی جانب سے دستیاب وسائل سے مریضوں کیلئے ذیادہ سے ذیادہ آسانیاں پیدا کرنے کا عمل جاری رکھیں گے ۔ اس موقع پر ایم ایس ڈاکٹر عمر اسحاق، اے ایم ایس ڈاکٹر عدنان خالد ، نرسنگ سپرنٹنڈنٹ آسیہ خانم و دیگر ڈاکٹرز بھی موجود تھے۔