Live Updates

پاکستان کی مسجد الاقصیٰ پر دھاوے اور اسرائیلی مظالم میں اضافے کی شدید مذمت، بین الاقوامی برادری سے اسرائیلی مظالم روکنے کیلئے فوری اور موثراقدامات کرنے کی اپیل

جمعرات 5 جون 2025 00:40

اسلام آباد (اُردو پوائنٹ اخبارتازہ ترین - اے پی پی۔ 05 جون2025ء) پاکستان نے مسجد الاقصیٰ پر اشتعال انگیز دھاوے اور اسرائیلی مظالم میں اضافے کی شدید مذمت کرتے ہوئے کہا ہے کہ مسجد کے مختلف داخلی راستوں کی خلاف ورزیوں سمیت یہ قابل مذمت اقدامات مسلمانوں کے اس مقدس مقام کی حرمت، تاریخی حیثیت اور قانونی مقام پر براہ راست حملہ ہیں۔ ترجمان دفتر خارجہ کی جانب سے بدھ کو جاری بیان کے مطابق ایسے قابل مذمت اقدامات نہ صرف دنیا بھر کے مسلمانوں کے جذبات کو شدید ٹھیس پہنچاتے ہیں بلکہ پہلے سے کشیدہ ماحول میں مزید بدامنی کو ہوا دینے کا خطرہ رکھتے ہیں۔

یہ اقدامات بین الاقوامی قوانین کی کھلی خلاف ورزیاں ہیں جنہیں فوری طور پر روکا جانا چاہیے۔ ترجمان کے مطابق غزہ میں بے گناہ فلسطینی شہریوں کو مسلسل نشانہ بنانا اسرائیلی قابض طاقت کی طرف سے نہایت تشویشناک امر ہے۔

(جاری ہے)

گزشتہ 24 گھنٹوں کے دوران تقریباً 100 فلسطینی شہریوں جن میں وہ افراد بھی شامل ہیں جو کھانے کی تقسیم کے مقامات کے قریب موجود تھے کو قتل کرنا اس بات کا ثبوت ہے کہ اسرائیلی قابض افواج کس بے دریغ انداز میں انسانیت کے خلاف جرائم کا ارتکاب کر رہی ہیں۔

ترجمان نے کہا کہ ہم بین الاقوامی برادری سے مطالبہ کرتے ہیں کہ وہ ان مظالم کو روکنے کے لیے فوری اور مؤثر اقدامات کرے اور اسرائیلی قابض افواج کو بین الاقوامی قوانین کی ان کھلی اور منظم خلاف ورزیوں پر جوابدہ ٹھہرائے۔ انہوں نے کہا کہ ہم غزہ میں لاکھوں افراد تک بلاروک و رکاوٹ انسانی امداد کی فراہمی اور مسجد الاقصیٰ کی حرمت، تاریخی اور قانونی حیثیت کے تحفظ کا بھی مطالبہ کرتے ہیں۔ترجمان کے مطابق پاکستان فلسطینی عوام کی ان کے حقِ خود ارادیت کی منصفانہ جدوجہد میں غیر متزلزل حمایت کا اعادہ کرتا ہے، ہم1967 سے پہلے کی سرحدوں اور دارالحکومت القدس الشریف کے ساتھ ایک آزاد، قابلِ عمل اور متصل فلسطینی ریاست کے قیام کے اپنے مطالبے کااعادہ کرتےہیں۔