Live Updates

عیدالاضحیٰ پر موسم کیسا رہے گا؟ محکمہ موسمیات نے نئی پیشگوئی کردی

شہریوں کو غیرضروری سفر سے گریز، پانی کے زیادہ استعمال اور دھوپ سے بچاؤ کیلئے احتیاطی تدابیر اپنانے کی ہدایت

ساجد علی جمعرات 5 جون 2025 14:03

عیدالاضحیٰ پر موسم کیسا رہے گا؟ محکمہ موسمیات نے نئی پیشگوئی کردی

اسلام آباد ( اُردو پوائنٹ اخبارتازہ ترین۔ 05 جون 2025ء ) محکمہ موسمیات کی جانب سے ملک میں عیدالاضحیٰ پر موسم کے حوالے سے نئی پیش گوئی کردی گئی۔ تفصیلات کے مطابق عیدالاضحیٰ کی تعطیلات کے موقع پر آئندہ ہفتے کے دوران ملک میں درجہ حرارت میں غیرمعمولی اضافہ متوقع ہے، پنجاب، اسلام آباد اور خیبرپختونخوا کے مختلف علاقوں میں 5 سے 7 جون تک شدید گرمی کی لہر کا امکان ہے، اسی طرح سندھ اور بلوچستان میں بھی 6 جون تک درجہ حرارت معمول سے کہیں زیادہ ریکارڈ کیے جانے کی پیشگوئی کی گئی ہے، درجہ حرارت 7 سے 12 ڈگری سینٹی گریڈ تک بڑھ سکتا ہے، محکمہ موسمیات نے ملک بھر میں شدید گرمی کی نئی لہر کے پیش نظر الرٹ جاری کردیا۔

بتایا گیا ہے کہ شدید گرمی کے باعث بجلی اور پانی کی طلب میں غیرمعمولی اضافے کا خدشہ ہے، اس صورتحال کو مد نظر رکھتے ہوئے پی ڈی ایم اے، این ڈی ایم اے اور دیگر متعلقہ اداروں کو پیشگی اقدامات کی ہدایت جاری کر دی گئی ہے، علاوہ ازیں محکمہ موسمیات نے شہریوں کو غیر ضروری سفر سے گریز، زیادہ پانی استعمال کرنے، اور دھوپ سے بچاؤ کے لیے احتیاطی تدابیر اپنانے کی ہدایت کی ہے۔

(جاری ہے)

ادھر وفاقی حکومت کی جانب سے ملک میں عیدالاضحیٰ کی تعطیلات کے حوالے سے نوٹی فکیشن جاری کردیا گیا، اس بار عید پر 4 چھٹیوں کا نوٹی فکیشن جاری کردیا گیا ہے، رواں سال عید الاضحٰی پر ہفتہ وار تعطیلات کے علاوہ صرف ایک اضافی تعطیل دیئے جانے کا امکان ظاہر کیا جا رہا تھا، تاہم وفاقی حکومت نے کل 4 چھٹیاں دینے کا فیصلہ کیا، وزیراعظم کی طرف سے عید الاضحی پر 4 سرکاری چھٹیوں کی منظوری کے بعد نوٹی فکیشن جاری کیا گیا جس کے تحت 6 جون بروز جمعہ سے 9 جون بروز پیر تک ملک میں عیدالاضحیٰ کی تعطیلات ہوں گی۔