پنجاب یونیورسٹی ریڈیوایف ایم 104.6کی23ویں سالگرہ پر کیک کاٹنے کی تقریب

لاہور (اُردو پوائنٹ اخبارتازہ ترین - اے پی پی۔ 05 جون2025ء) پنجاب یونیورسٹی سکول آف کمیونیکیشن سٹڈیز ریڈیو ایف ایم 104.6کی23ویں سالگرہ کے موقع پر کیک کاٹنے کی تقریب کا انعقاد کیا گیا۔ اس موقع پر سابق وائس چانسلر پنجاب یونیورسٹی لیفٹیننٹ جنرل(ر)ارشد محمود، ڈائریکٹر سکول آف کمیونیکیشن سٹڈیز پروفیسر ڈاکٹر عابدہ اشرف، چیئرپرسن شعبہ کمیونیکیشن اینڈ میڈیا ریسرچ پروفیسر ڈاکٹر نوشینہ سلیم، چیئرپرسن فلم اینڈ براڈ کاسٹنگ پروفیسر ڈاکٹر لبنی ظہیر، کو آرڈینیٹر ریڈیو ڈاکٹر اکرم سومرو، پروگرام منیجر محمد ارشاد چوہدری،فیکلٹی ممبران اور طلباطالبات نے شرکت کی۔

تقریب سے خطاب کرتے ہوئے لیفٹیننٹ جنرل (ر) ارشد محمود نے کہا کہ 23برس پہلے بطور وائس چانسلر طلباطالبات کی ذہنی استعداد کار کو بڑھانے اور عملی تربیت فراہم کرنے کیلئے شعبہ ابلاغیات میں ریڈیو کا آغاز کیا۔

(جاری ہے)

انہوں نے کہا کہ اکتوبر 2005 میں مظفر آباد کشمیر میں زلزلے کے دوران شعبہ کے طلباطالبات اور اساتذہ نے تباہ حال علاقوں میں براہ راست نشریات کے ذریعے بہترین رپورٹنگ کرکے مثبت صحافت کا ثبوت دیا۔

انہوں نے کہا کہ مظفر آباد میں ریڈیو کی خدمات کونہ قومی بلکہ بین الاقوامی سطح پر پذیرائی ملی۔ انہوں نے کہا کہ طلباطالبات ریڈیو سے تربیت حاصل کرکے نہ صرف ادارے بلکہ پاکستان کا نام دنیا بھر میں روشن کر سکتے ہیں۔ انہوں نے نوجوان طلبا کو نصیحت کرتے ہوئے کہاکہ سوشل میڈیا پلیٹ کو مثبت انداز میں استعمال کرکے مہذب شہری ہونے کا ثبوت دیں۔

انہوں نے کہا کہ ایک دوسرے کی رائے کا احترام، صبر اور برداشت کے کلچر کو فروغ دینا وقت کی اہم ضرورت ہے۔ پروفیسر ڈاکٹر عابدہ اشرف نے لیفٹیننٹ جنرل (ر) ارشد محمود کا شکریہ ادا کیا جن کی کاوش سے طلباطالبات کو عملی تربیت کا پلیٹ فارم میسر آیا۔ انہوں نے کہا کہ پنجاب یونیورسٹی ریڈیو سے تربیت حاصل کرنے والے شعبہ ابلاغیات کے بیشتر طلباطالبات ملکی و غیر ملکی میڈیا میں خدمات انجام دے رہے ہیں۔

انہوں نے کہا کہ موجودہ دور میں ریڈیو پوڈ کاسٹ کی صورت اختیار کرچکا ہے جس سے مستفید ہونے کیلئے جدید ٹیکنالوجی سے آگاہی ضروری ہے۔ بعد ازاں لیفٹیننٹ جنرل (ر) ارشدمحمود و دیگر نے پنجاب یونیورسٹی ریڈیو ایف ایم 104.6کی 23ویں سالگرہ کا کیک کاٹا۔پنجاب یونیورسٹی جامع مسجد میں نماز عید6 بجے ادا کی جائے گی۔پنجاب یونیورسٹی جامع مسجد قائد اعظم (نیو) کیمپس میں عید الاضحی کی نماز صبح6 بجے ادا کی جائے گی جس کی امامت ڈاکٹر حافظ محمد معاذکریں گے۔