Live Updates

پاکستان نے ہمیشہ سفارت کاری سے مسائل کے حل کی بات کی، پانی جیسے بنیادی انسانی حق پر کوئی سمجھوتہ ممکن نہیں، بلاول بھٹو

پاکستان ذمہ دار ایٹمی ریاست ہے اور ہمیشہ امن کے پیغام کا علمبردار رہا ہے لیکن پانی کو ہتھیار کے طور پر استعمال کرنا اعلان جنگ کے مترادف ہوگا، سربراہ پاکستانی سفارتی وفد کاغیر ملکی ٹی وی کو انٹرویو

فیصل علوی پیر 9 جون 2025 14:45

پاکستان نے ہمیشہ سفارت کاری سے مسائل کے حل کی بات کی، پانی جیسے بنیادی ..

لندن(اردوپوائنٹ اخبار تازہ ترین۔09 جون 2025)پاکستانی سفارتی وفد کے سربراہ بلاول بھٹو زرداری کا کہنا ہے کہ پاکستان نے ہمیشہ سفارت کاری سے مسائل کے حل کی بات کی ، پانی جیسے بنیادی انسانی حق پر کوئی سمجھوتہ ممکن نہیں، بھارت کے جارحانہ رویے اور سندھ طاس معاہدے کی ممکنہ معطلی پر شدید تحفظات کا اظہار ،غیر ملکی ٹی وی کو انٹرویو دیتے ہوئے سربراہ پاکستانی وفد نے کہا کہ بھارت سندھ طاس معاہدے کو یکطرفہ طور پر معطل نہیں کر سکتا اور ایسا کوئی بھی اقدام عالمی قوانین کی سنگین خلاف ورزی تصور ہوگا۔

پاکستان خطے میں امن و استحکام کا خواہاں ہے لیکن خودمختاری، آبی حقوق اور کشمیری عوام کے حق خود ارادیت پر کوئی سمجھوتہ نہیں ہو سکتا۔ انہوں نے کہا کہ پاکستان ایک ذمہ دار ایٹمی ریاست ہے اور ہمیشہ امن کے پیغام کا علمبردار رہا ہے لیکن پانی کو ہتھیار کے طور پر استعمال کرنا اعلان جنگ کے مترادف ہوگا۔

(جاری ہے)

تمام مسائل کا مستقل اور پائیدار حل مسئلہ کشمیر سے جڑا ہوا ہے۔

قبل ازیںسابق وزیر خارجہ بلاول بھٹو زرداری کی قیادت میں پاکستان ایک اعلیٰ سطحی سفارتی وفد واشنگٹن اور نیویارک کے کامیاب دورے کے بعد لندن پہنچ گیا ہے۔ وفد کا مقصد پاکستان کے موقف کو عالمی سطح پر موثر انداز میں اجاگر کرنا اور بین الاقوامی برادری کو درپیش علاقائی چیلنجز سے آگاہ کرنا ہے۔ وفد معروف تھنک ٹینکس اور عالمی میڈیا سے بھی رابطے کرے گاجس میں پاکستان کی خطے میں امن و استحکام کیلئے جاری کوششوں کو اجاگر کیا جائے گا۔

اس موقع پر بھارتی حکومت کے جارحانہ اقدامات اور ان کے منفی اثرات پر بھی عالمی برادری کو آگاہ کیا جائے گا۔ وفد برطانیہ میں پارلیمنٹ کی سینئر قیادت سے ملاقاتیں کرے گا جبکہ جموں و کشمیر پر آل پارٹیز پارلیمانی گروپ کے ساتھ بھی اہم مشاورتی نشستیں طے ہیں۔ ان ملاقاتوں میں مسئلہ کشمیر، علاقائی سلامتی، اور انسانی حقوق کی صورتحال پر گفتگو متوقع ہے۔

پاکستانی سفارتی وفدعالمی برادری سے مطالبہ کرے گا کہ وہ جنوبی ایشیا میں پائیدار امن کے فروغ میں موثر کردار ادا کرے۔ سندھ طاس معاہدے کی روایتی کارروائی کی بحالی کا معاملہ بھی وفد کے ایجنڈے میں شامل ہے، جو اس بات کی اہمیت کو اجاگر کرتا ہے کہ آبی وسائل کے پرامن اور منصفانہ استعمال کے لیے بین الاقوامی اصولوں پر عمل ضروری ہے۔