سرکاری تشہیر کے لیے کھربوں، بھارت میں صحافت کی آزادی زوال پذیر

ھ*مالی سال 2025-26 کے لیے حکومت نے 12 ارب روپے سے زائد کا بجٹ صرف عوامی تشہیر کے لیے مختص

پیر 9 جون 2025 16:20

ةنئی دہلی (اُردو پوائنٹ اخبارتازہ ترین - آن لائن۔ 09 جون2025ء) مودی سرکار نے اپنی سیاسی ساکھ بچانے اور عوامی تاثر کو قابو میں رکھنے کے لیے ایک بار پھر اربوں روپے سرکاری تشہیر پر خرچ کرنے کا منصوبہ بنایا ہے۔ مالی سال 2025-26 کے لیے حکومت نے 12 ارب روپے سے زائد کا بجٹ صرف عوامی تشہیر کے لیے مختص کیا ہے۔ گزشتہ مالی سال میں بھی حکومت کی جانب سے 1228 کروڑ روپے میڈیا پر خرچ کیے گئے، جس کا مقصد اپنی کارکردگی کو بڑھا چڑھا کر پیش کرنا اور اصل مسائل سے عوام کی توجہ ہٹانا تھا۔

حکومت کی جانب سے آزاد میڈیا پر قدغنیں لگانا اور بھارت کے بڑے نیوز چینلز پر اثر و رسوخ حاصل کرنا نئی بات نہیں۔ میڈیا پر یہ گرفت بھارت کے دو بڑے کارپوریٹ گروپس، ریلائنس انڈسٹریز اور اڈانی انٹرپرائزز، کے ذریعے مزید مضبوط کی گئی ہے۔

(جاری ہے)

این ڈی ٹی وی جیسے مقبول ادارے پر اڈانی گروپ کا کنٹرول میڈیا کی آزادی پر سنگین سوالات اٹھاتا ہے۔ گزشتہ 15 برسوں میں ریلائنس اور اڈانی گروپ نے بھارتی میڈیا انڈسٹری میں غیرمعمولی غلبہ حاصل کیا ہے، اور ان کا حکومت سے قریبی تعلق انہیں اشتہاری اور پالیسی فائدے دلانے کا ذریعہ بن چکا ہے۔

میڈیا ادارے اب تجارتی مفادات اور سرکاری اشتہارات کے دباؤ کے تحت چلائے جا رہے ہیں، جس کی وجہ سے حقائق پر مبنی رپورٹنگ اور آزاد صحافت بری طرح متاثر ہوئی ہے۔ ایسے حالات میں 12 ارب روپے کا تشہیری بجٹ صرف اس بات کی عکاسی کرتا ہے کہ گودی میڈیا کے پروپیگنڈے کو مزید تقویت دی جا رہی ہے، تاکہ حکومت کی ناکامیوں کو چھپایا جا سکی-