خط غربت کی لکیر سے نیچے کی زندگی گزارنے والے افراد 45 فیصد ہو چکے،وقاص اکرم،عمرایوب

منگل 10 جون 2025 18:32

اسلام آباد(اُردو پوائنٹ اخبارتازہ ترین - آن لائن۔ 10 جون2025ء)پاکستان تحریک انصاف نے اقتصادی اشاریوں سے متعلق حکومت کے اکنامک سروے پر تنقید کی ہے۔اپوزیشن لیڈر عمر ایوب،مرکزی سیکریٹری اطلاعات پی ٹی آئی شیخ وقاص اکرم اور رکن اسمبلی مبین عارف جٹ نے خیبر پختونخواہ ہاؤس میں مشترکہ پریس کانفرنس میں خبروں کا حوالہ دیتے ہوئے کہا خط غربت کی لکیر سے نیچے کی زندگی گزارنے والے افراد 45 فیصد ہو چکے،پورا بجٹ آئی ایم ایف نے دیا، یہ اکنامک سروے فارم 47 والا ہے۔

مرکزی سیکریٹری اطلاعات پی ٹی آئی شیخ وقاص اکرم نے کہا اکنامک سروے کی پریس کانفرنس ایسی تھی جیسے کھسیانی بلی کھمبا نوچے، غریبوں کی چولیں ہلا کر رکھ دی ہیں، اخباری رپورٹس کے مطابق 35 فیصد افراد جو خط غربت کی لکیر سے نیچے والی زندگی گزار رہے تھے انکی تعداد 45 فیصد ہو چکی۔

(جاری ہے)

تین کروڑ لوگ خط غربت کی لکیر سے نیچے زندگی گزار رہے ہیں، تین سالوں میں کوئی زلزلہ یا قدرتی آفت نہیں آئی جس سے زراعت گراوٹ کا شکار ہو۔

اکنامک سروے پریس کانفرنس میں کہا گیا 37 فیصد آبادی زراعت کے شعبے سے وابستہ ہیں،37 فیصد آبادی کی کمر توڑ دی گئی ہے، خیبرپختواہ کے صوبائی وزیر خزانہ نے این ایف سی اجلاس میں سوال پوچھا بجلی کی گروتھ کیسے بڑھی، جواب دیا گیا لوگوں کے گھروں میں لگے سولر پینلز سے پیدا ہونے والی بجلی شمار کی گئی، عام لوگوں کے گھروں کی چھتوں پر لگی سولر پلیٹس سے حکومت کا کوئی تعلق نہیں۔

جب ہماری حکومت گئی 43 ہزار 500 سو ارب روپے قرض تھا، 31ہزار 500 ارب روپے کا قرض تین سالوں میں لیا گیا،اپوزیشن لیڈر عمر ایوب نے کہا یہ لیلا بجٹ ہے، پاکستان میں قوت خرید برباد ہوچکی ہے، 2022ء میں جو شخص پچاس ہزار روپے کما رہا تھا آج اس کی ویلیو تقریباً 22 ہزار رہ گئی، تین سالوں میں گندم کی قیمت میں پچاس فیصد اضافہ ہوا، یہ اعداد و شمار میں وزارت شماریات کے اعدادوشمار کے دو سالوں کے ڈیٹا کے موازنہ کرکے دے رہا ہوں۔

ملک میں غربت 44۔7 فیصد تک پہنچ چکی ہے، پلاننگ کا بجٹ 80 فیصد بغیر استعمال ہوئے واپس چلا گیا، یہ بھی دیکھنا چاہیے چار ٹانگوں والے گدھوں میں اضافہ ہوا یا دو ٹانگوں والے گدھوں میں اضافہ ہوا،2022ء میں پٹرول لیوی 20 روپے فی لیٹر تھی، پریس کانفرنس سے مبین عارف جٹ نے بھی خطاب کیا۔