سول سوسائٹی اراکین کی اقوام متحدہ، او آئی سی سے کشمیرکے حوالے سے فیصلہ کن کارروائی کی اپیل

سرینگر (اُردو پوائنٹ اخبارتازہ ترین - اے پی پی۔ 10 جون2025ء) غیرقانونی طورپر بھارت کے زیر قبضہ جموں وکشمیرمیں کل جماعتی حریت کانفرنس نے بڑے پیمانے میں بھارتی فوجیوں کی تعیناتی پرسخت تشویش کا اظہار کرتے ہوئے کہاہے کہ مقبوضہ علاقے کو ایک کھلی جیل میں تبدیل کردیاگیا ہے۔کشمیرمیڈیاسروس کے مطابق کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر میں جاری ایک بیان میں کہا کہ بھارتی فوجیوں کی مسلسل تعیناتی کے باعث لوگ خوف و دہشت کے ماحول میں زندگی گزارنے پر مجبور ہیں کیوں کہ وہ ہر گلی اور محلے کی نگرانی کررہے ہیں۔

انہوں نے کہاکہ تقریبا ً10 لاکھ بھارتی فوجی مقبوضہ علاقے میں تعینات ہیں اور اس طرح ہر سات شہریوں پر ایک قابض فوجی پہرہ دے رہا ہے جس کی مثال دنیا میں کہیں نہیں ملتی۔

(جاری ہے)

ایڈووکیٹ منہاس نے اقوام متحدہ اور انسانی حقوق کی عالمی تنظیموں سمیت عالمی برادری پر زور دیا کہ وہ اپنی خاموشی توڑ کرمتنازعہ علاقے میں منظم انداز میں فو جی مظالم اورآبادی کے تناسب میں تبدیلی پر بھارت کو جوابدہ ٹھہرائیں۔

سول سوسائٹی کے ارکان نے سرینگر میں منعقدہ ایک اجلاس میں اقوام متحدہ اور اسلامی تعاون تنظیم پر زور دیا کہ وہ مقبوضہ جموں و کشمیر کی بگڑتی ہوئی صورتحال کے حوالے سے فوری اور فیصلہ کن اقدامات کریں۔ ڈاکٹر زبیر احمد راجہ، محمد فرقان، محمد اقبال شاہین اور سید حیدر حسین نے کہا کہ بی جے پی کی زیر قیادت بھارتی حکومت نے کشمیریوں کو تمام سیاسی اور قانونی حقوق سے محروم کر رکھا ہے۔

انہوں نے جموں وکشمیر میں جاری پکڑ دھکڑ، بلاجواز گرفتاریوں، کارکنوں کو ہراساں کئے جانے اور اختلاف رائے پر سزا دینے کیلئے عدالتوں کے غلط استعمال کی مذمت کی۔ انہوں نے بھارت کے جابرانہ اقدامات کو روکنے کے لیے فوری بین الاقوامی مداخلت کا مطالبہ کیا۔دریں اثناء ریاستی تحقیقاتی ادارے نے بھارتی پیراملٹری فورسز کے ساتھ مل کر ضلع پونچھ کے علاقے ساوجیاں میں ایک شہری محمد جمیل کے گھر پر چھاپہ مارا۔

کارروائی کے دوران بھارتی فورسز نے مکینوں کو ہراساں کیا اوراہم دستاویزات ، موبائل فون اوردیگر الیکٹرانک آلات قبضے میں لے لئے۔ عیدالاضحیٰ کے موقع پر واٹس ایپ گروپ میں گائے کی تصویر پوسٹ اورلائیک کرنے پرگورنمنٹ میڈیکل کالج راجوری کی انتظامیہ نے بی ایس سی نرسنگ کے تین طالب علموں کو کلاسوں میں جانے سے روک دیاہے۔بھارتی میڈیا میں وادی کشمیر اور جموں خطے کے نوجوانوں کو غلط انداز میں پیش کرنے پر دونوں خطوں کے نوجوانوں نے شدید مایوسی کا اظہار کیا ہے۔

انہوں نے کہاکہ بھارتی ذرائع ابلاغ کشمیری نوجوانوں کو بدنام کررہے ہیں جبکہ جموں کے نوجوانوں کی غلط ترجمانی کی جارہی ہے۔ طلباء اور پیشہ ور افراد نے اپنے انٹرویوز میں کہا کہ پہلگام حملے کے بعد پیش کئے گئے بیانیے کے باعث بہت سے کشمیری طلباء کو ہراساں کیاگیا جو گھر واپس جانے پر مجبور ہوئے ہیں۔