لاہور سے روس کے لئے 22جون سے ٹرین سروس شروع کی جائے گی،محمد حنیف عباسی

پنجاب انفارمیشن ٹیکنالوجی بورڈ سے ایم او یو کے بعد ریلویز کے پورے سسٹم کو ڈیجیٹلائز کر دیا جائے گا،وزیر ریلوے

منگل 10 جون 2025 21:36

لاہور سے روس کے لئے 22جون سے ٹرین سروس شروع کی جائے گی،محمد حنیف عباسی

ملتان (اُردو پوائنٹ اخبارتازہ ترین - این این آئی۔ 10 جون2025ء)وفاقی وزیر ریلوے حنیف عباسی نے کہا ہے کہ پنجاب انفارمیشن ٹیکنالوجی بورڈ سے ایم او یو کے بعد ریلویز کے پورے سسٹم کو ڈیجیٹلائز کر دیا جائے گا،متعدد ٹرینوں اور ہسپتالوں کو آؤٹ سورس کرنے سمیت لاہور سیروس کیلئے 22 جون سے ٹرین سروس بھی شروع کی جائے گی۔ منگل کو میڈیا سے گفتگو کرتے ہوئے انہوں نے کہا کہ ریلوے نے 31 مئی تک اپنی 77 سالہ تاریخ میں سب سے زیادہ ریونیو حاصل کیا جس میں مزید اضافے کیلئے گڈز ٹریننیں چلائیں گے۔

ریلوے سٹیشنز اور کالونیوں کو ستھرا پنجاب مہم کے تحت صاف کیا جا رہا ہے،ریلوے ٹریکس پر پھلدار درخت اور پودے بھی لگائے جائیں گے۔وفاقی وزیر ریلوے نے کہا کہ وزیر اعظم کی خواہش ہے کہ ازبکستان اور قازقستان کو ریلوے ٹریک سے ملایا جائے۔

(جاری ہے)

انہوں نے کہا کہ تھرکول اور ریکوڈک کی کامیابی کیلئے ہمیں ریلوے کو جدید خطوط پر استوار کرنا ہو گا اور اسے ترقی دینا ہو گی۔

انہوں نے کہا کہ مسافروں کی سہولت کیلئے جلد ہی فری وائی فائی سروس شروع کرنے جا رہے ہیں۔ریلوے میں پنجاب فوڈ اتھارٹی کے ذریعے فوڈ کوالٹی کو بہتر اور مسافروں کیلئے سہولتوں میں اضافہ کر کے ان کا اعتماد بحال کیا جائے گا تاکہ ریلوے آمدنی میں اضافہ کیا جا سکے۔وفاقی وزیر نے بتایا کہ ریلویز کے 14 سکولوں میں 5200 بچے زیر تعلیم ہیں،آوٹ سورس کرنے سے ریلوے سکولوں کا بھی معیار تعلیم مزید بہتر ہو گا۔

ریلوے کی ترقی کیلئے بہت سے منصوبے زیرِ غور ہیں۔حالیہ پاک بھارت کشیدگی بارے سوال کے جواب میں انہوں نے کہا کہ آرمی چیف کو بہترین کارکردگی پر فیلڈ مارشل بنایا گیا۔پاکستاں دفاعی اعتبار سے ایک مضبوط ملک ہے اور یہ دنیا نے تسلیم کیا۔دشمن نے رات کی تاریکی میں پاکستان پر حملہ کیا جس کا ہماری فوج نے منہ توڑ جواب دیا اور پوری قوم کا سر فخر سے بلند کیا۔محمد حنیف عباسی نے کہا کہ پانی ہماری زندگی ہے جس پر کوئی سمجھوتہ نہیں ہو گا۔