Live Updates

جے یو پی نظریاتی، اصول پسند ،باکردار جماعت ،کسی مفاد پرست، مفاہمت پسند یا دوغلی سیاست کرنیوالے کیلئے جگہ نہیں، راؤ عبدالرحمٰن

منگل 10 جون 2025 20:50

کراچی(اُردو پوائنٹ اخبارتازہ ترین - این این آئی۔ 10 جون2025ء)جمعیت علماء پاکستان (نورانی) یوتھ ونگ کراچی ڈویژن کے صدر راؤ عبدالرحمٰن نے کہا ہے کہ جمعیت علماء پاکستان نے ہمیشہ حق و سچ کا علم بلند رکھا اور ایسے ہی باکردار، مخلص اور اصول پسند افراد کو اپنی صفوں میں شامل کیا جو اپنے مؤقف پر ثابت قدم رہنے والے تھے۔ یہی تربیت قائد اہلسنّت حضرت علامہ شاہ احمد نورانی رحمة اللہ علیہ نے اپنے کارکنان کو دی تھی اور آج اسی مشن کو قائد جمعیت ڈاکٹر ابو الخیر محمد زبیر پوری دیانت داری سے آگے بڑھا رہے ہیں۔

انہوں نے کہا کہ ہماری جماعت مفاد پرستی، ذاتی مفادات، موقع پرستی یا اقتدار کی ہوس کے اصولوں پر نہیں بلکہ صداقت، دیانت، نظریاتی وابستگی اور اسلامی اقدار پر قائم ہے۔

(جاری ہے)

یہی وجہ ہے کہ یہاں کسی مفاد پرست، مفاہمت پسند یا دوغلی سیاست کرنے والے شخص کے لیے کوئی جگہ نہیں۔راؤ عبدالرحمٰن نے کہا کہ آج کا نوجوان بیدار ہو چکا ہے اور وہ جان چکا ہے کہ وقتی نعروں اور فریب پر مبنی سیاست اس ملک کو صرف تباہی کی طرف لے جا رہی ہے۔

جمعیت علماء پاکستان نورانی اس وقت واحد جماعت ہے جو اس ملک و قوم کے بگڑتے حالات کو بدلنے کی صلاحیت اور نظریاتی اساس رکھتی ہے۔انہوں نے کہاکہ اب بھی وقت ہے، ذرا نہیں بلکہ پورا سوچیی! یہ ملک ایماندار قیادت کا طلب گار ہے اور وہ قیادت صرف جمعیت علماء پاکستان نورانی فراہم کر سکتی ہے۔ انہوں نے تمام کارکنان کو ہدایت کی کہ وہ عوامی رابطہ مہم تیز کریں، نظریاتی شعور کو اجاگر کریں اور ہر محاذ پر جمعیت علماء پاکستان کے پیغام کو عام کریں۔