عوامی حلقوں نے وفاقی بجٹ 2025-26 کو متوازن اور عوام دوست قرار دے دیا

فیصل آباد (اُردو پوائنٹ اخبارتازہ ترین - اے پی پی۔ 10 جون2025ء) عوام کے مختلف طبقات نے وفاقی بجٹ 2025-26 کو متوازن اور عوام دوست قرار دے دیا ہے۔ آج یہاں بجٹ ریکشن دیتے ہوئے تاجر رہنماؤں اور سول سوسائٹی کے نمائندوں نے کہا کہ حکومت نے مشکل معاشی حالات کے باوجود تنخواہ دار طبقے کو بہت بڑا ریلیف دیا ہے۔ یہ طبقہ مہنگائی کی وجہ سے بہت پس رہا تھا۔ موجودہ بجٹ میں تجویز کردہ تنخواہوں اور پنشن میں اضافہ اس طبقہ کی مالی مشکلات کو کم کرنے میں بہت بڑا کردار ادا کرے گا۔

وفاقی وزیر خزانہ سینٹر محمد اورنگزیب کی طرف سے پیش کردہ 2025-26کے سالانہ بجٹ کی تجاویز پر ری ایکشن دیتے ہوئے فیصل آباد چیمبر آف کامرس اینڈانڈسٹری کے صدر ریحان نسیم بھراڑہ نے کہا کہ حکومت نے پراپرٹی کے شعبہ ترقی کیلئے زبردست اقدامات اٹھائے ہیں۔

(جاری ہے)

انہوں نے کہا کہ پراپرٹی کے شعبہ میں ٹیکس کی کمی سے امید ہے کہ بیرون ملک مقیم پاکستانی اب اپنے ملک میں سرمایہ کاری کرنے کو ترجیح دیں گے۔

تاہم انہوں نے کہا کہ حکومت کو صنعتی شعبہ کے ساتھ ساتھ ایکسپورٹ سیکٹر کی بہتری کیلئے بھی اقدامات کا اعلان کرنا چاہیے۔ انہوں نے صنعتوں کی بحالی اور پیداواری لاگت کے حوالے سے بجلی کی قیمت اور مارک اپ میں کمی کا مطالبہ کیا اور کہا کہ اڑان پاکستان کے تحت برآمدات کو 60۔ ارب ڈالر تک بڑھانے کے سلسلہ میں برآمد کنندگان کیلئے حکومت کو واضح پیکیج لاناچاہیے۔

انہوں نے تنخواہوں میں اضافہ، تنخواہ دار طبقہ کیلئے ٹیکس کی شرح میں کمی اور تعمیراتی شعبہ پر فیڈرل ایکسائز ڈیوٹی میں کمی کو سراہااورکہا کہ حکومت نے کمرشل پراپرٹی پر فیڈرل ایکسائز ڈیوٹی ختم کر کے بہت اچھا اقدام اٹھایا ہے۔تاہم انہوں نے کہا کہ 9ہزار ٹریلین کی غیر دستاویزی سرمایہ کاری کو ملکی معیشت کا حصہ بنانے اور آئی ٹی کی برآمدات میں تیزی لانے کیلئے سرمایہ کی گردش بہت ضروری قرار دیا ہے۔

اس موقع پرفیصل آباد چیمبر کے سینئر نائب صدر قیصر شمس گچھا اور نائب صدر شاہد ممتاز باجوہ کے علاوہ چیمبر کے سابق صدور اور ایگزیکٹو ممبران بھی موجود تھے جنھوں نے صحافیوں کے ہمراہ وفاقی وزیر خزانہ سینٹر محمد اورنگزیب کی تقریر قومی اسمبلی سے براہ راست ٹی وی اسکرین پر دیکھی۔ اس موقع پر اے پی پی سے بات چیت کرتے ہوئے پاور لومز اونرز ایسوسی ایشن کے چیئرمین وحید خالق رامے نے وفاقی بجٹ کو تنخواہ دار طبقہ کیلئے خوش آئند قرار دیا اور کہا کہ حکومت کو اسے صنعت دوست بنانے کیلئے بھی فوری اقدامات اٹھانے چاہئیں۔

انہوں نے کہا کہ یہ بجٹ سول سرونٹس کیلئے ایک اچھی نوید ہے۔ اگر حکومت اس میں صنعتی شعبہ اور ایکسپورٹ سیکٹر کیلئے مراعات کا اعلان کردے تو اس سے برآمدات کے اہداف کا حصول آسان ہوجائے گااور ملک تیزی سے معاشی ترقی کی منازل عبور کرے گا۔