Live Updates

ایران پر اسرائیل کے حملے کی مذمت کرتے ہیں ،قائد حزب اختلاف شبلی فراز

جمعہ 13 جون 2025 13:06

اسلام آباد (اُردو پوائنٹ اخبارتازہ ترین - اے پی پی۔ 13 جون2025ء) سینیٹ میں قائد حزب اختلاف شبلی فراز نے کہا ہے کہ ایران پر اسرائیل کے حملے کی مذمت کرتے ہیں، اس جنگ کے خطرناک اثرات مرتب ہوں گے، وفاقی بجٹ الفاظ کا ہیر پھیر ہے،ہم کب تک بیساکھیوں پر چلیں گے۔ جمعہ کو سینیٹ میں آئندہ مالی سال کے بجٹ پر بحث کا آغاز کرتے ہوئے قائد حزب اختلاف شبلی فراز نے کہا کہ ایران پر اسرائیل کے حملے سے خطہ عدم استحکام کا شکار ہو گیا ہے ،اسرائیل کے حملے کی مذمت کرتے ہیں ایران اور اسرائیل کے درمیان کشیدگی سے عالمی منڈی میں تیل کی قیمت میں 8 ڈالر فی بیرل اضافہ ہو گیا ہے۔

ایران اسرائیل جنگ کے خطرناک اثرات مرتب ہوں گے ۔ انہوں نے کہا کہ وفاقی بجٹ الفاظ کا ہیر پھیر ہے اس میں دئے گئے اعدادوشمار حقیقت پر مبنی نہیں ہیں۔

(جاری ہے)

انہوں نے کہا کہ یہ بجٹ متنازعہ ہوگیا ہے ،کوئی بھی کام جس کی عوام میں پزیرائی نہ ہو اسے مقبولیت نہیں ملتی ۔ انہوں نے کہا کہ کسان پریشان اور زرعی شعبہ ترقی کی بجائے تنزلی کا شکار ہے،صنعتی ترقی رک گئی ہے فیکٹریاں بند ہو رہی ہیں، اس وقت کاروباری افراد کی ایل سیز بند ہیں۔

ادھر ادھر سے قرضے لے کر زرمبادلہ کے ذخائر کو بڑھایا گیا ہے ،ہم کب تک بیساکھیوں کے سہارے چلیں گے۔ برآمدات اور درآمدات گر گئی ہیں۔ اس صورتحال کی وجہ سے مزید 61 ملین افراد خط غربت سے نیچے چلے گئے ہیں جبکہ مجموعی طور پر آدھی آباد خط غربت سے نیچے جا چکی ہے۔ملک کی 22 فیصد آبادی بیروزگاری کا شکار ہے،ملک میں انڈسٹری کے حوالے سے کوئی پالیسی نہیں ہے،بے روزگار افراد میں 14 ملین کا اضافہ انتہائی تشویشناک بات ہے،انہوں نے کہا کہ کمرشل بینکوں سے قرضے لے کر گردشی قرضے کا خاتمہ کیسے ہو گا، بجلی کے شعبے میں جامع اصلاحات کی ضرورت ہے ،ایف بی آر کی تنظیم نو ہونی چاہیئے۔