Live Updates

گوادر پورٹ پر افغان ٹرانزٹ ٹریڈ کا دوسرا جہاز کامیابی سے لنگر انداز، بین الاقوامی اعتماد میں اضافہ ہوا، جنید انوار چوہدری

ہفتہ 14 جون 2025 17:00

اسلام آباد (اُردو پوائنٹ اخبارتازہ ترین - این این آئی۔ 14 جون2025ء)وفاقی وزیر برائے بحری امور محمد جنید انوار چوہدری نے کہا ہے کہ افغان ٹرانزٹ ٹریڈ کے تحت دوسرا تجارتی بحری جہاز گوادر پورٹ پر کامیابی سے لنگرانداز ہو گیا ہے،یہ جہاز افغانستان کے لئے 20 ہزار میٹرک ٹن ڈی اے پی کھاد لے کر پہنچا ہے۔ہفتے کے روز ایک بیان میںانہوں نے کہا کہ بحری جہاز کی گوادر بندرگاہ پر کامیاب برتھنگ پاکستان کی بحری پالیسیوں کی کامیابی اور گوادر کی بڑھتی ہوئی تجارتی اہمیت کا واضح ثبوت ہے، اس پیش رفت سے نہ صرف خطے میں بین الاقوامی اعتماد میں اضافہ ہوا ہے بلکہ پاکستان اور افغانستان کے درمیان تجارتی تعلقات بھی مزید مستحکم ہو رہے ہیں۔

جنید انوار چوہدری نے اس موقع پر کہا گوادر پورٹ تیزی سے خطے کے لیے ایک اہم تجارتی گیٹ وے بنتا جا رہا ہے، اس کے ذریعے افغانستان کی بین الاقوامی منڈیوں تک رسائی مزید مؤثر اور کم لاگت ہو گی۔

(جاری ہے)

انہوں نے اس بات پر زور دیا کہ گوادر سے ٹرانزٹ کے اخراجات میں نمایاں کمی کی توقع ہے، جو خطے میں تجارتی سہولت اور پائیدار ترقی کے لیے انتہائی اہم ہے۔

وفاقی وزیر نے کہا کہ گوادر بندرگاہ مکمل طور پر تجارتی سامان سنبھالنے کی صلاحیت رکھتی ہے اور یہاں پر تجارتی سرگرمیوں میں مسلسل اضافہ ہو رہا ہے۔ انہوں نے اسے پاکستان کے میری ٹائم شعبے کی بہتری، جدید انفراسٹرکچر اور خطے میں پاکستان کے بڑھتے ہوئے اقتصادی کردار کی کامیابی قرار دیا،یہ دوسرا جہاز ہے جو افغان ٹرانزٹ ٹریڈ کے تحت فروری 2025 کے بعد گوادر بندرگاہ پر لنگر انداز ہوا ہے، اس سے قبل بھی افغانستان کے لیے تجارتی جہاز گوادر کے ذریعے کامیابی سے روانہ ہو چکا ہے، جو اس بندرگاہ کے بڑھتے ہوئے کردار کی نشاندہی کرتا ہے۔

وزیر بحری امور نے حکومت پاکستان کے عزم کو دہراتے ہوئے کہا کہ گوادر کی ترقی اور فعال استعمال نہ صرف ملکی معیشت کو فائدہ دے گا بلکہ علاقائی رابطوں کو فروغ دے کر پورے وسطی ایشیا کیلئے ایک اقتصادی راستہ فراہم کریگا۔