Live Updates

امیر و غریب کے درمیان بڑھتے ہوئے فرق کو ختم کرنے کے لیے عملی اقدامات کیے جائیں، سینیٹروقار مہدی

منگل 17 جون 2025 15:47

اسلام آباد (اُردو پوائنٹ اخبارتازہ ترین - اے پی پی۔ 17 جون2025ء) اسلام آباد پاکستان پیپلز پارٹی سے تعلق رکھنے والے سینیٹر وقار مہدی نے کہا ہے کہ بجٹ میں حقیقی عوامی ریلیف کو ترجیح دی جائے اور امیر و غریب کے درمیان بڑھتے ہوئے فرق کو ختم کرنے کے لیے عملی اقدامات کیے جائیں۔ منگل کو ایوان بالا میں بجٹ پر بحث میں حصہ لیتے ہوئے انہوں نے نشاندہی کی کہ تنخواہ دار طبقے کی تنخواہوں میں صرف 10 فیصد اور پینشنرز کیلئے صرف 7 فیصد اضافہ کیا گیا جو کہ موجودہ معاشی حالات میں کسی بھی صورت کافی نہیں۔

سینیٹر وقار مہدی نے کہا کہ غریب عوام کیلئے بجٹ میں محدود سہولتیں رکھی گئی ہیں، وہیں عوامی نمائندوں اور اراکین پارلیمنٹ کی تنخواہوں میں پانچ سو فیصد تک اضافہ کیا گیا ہے جو کہ تضاد کی بدترین مثال ہے۔

(جاری ہے)

انہوں نے تجویز دی کہ وزیر خزانہ کو کم از کم ایک دن کے لیے عوام میں جا کر زندگی گزارنی چاہیے تاکہ انہیں اندازہ ہو کہ عام شہری کس قدر مشکلات کا شکار ہے۔

سینیٹر وقار مہدی نے حکومت سے مطالبہ کیا کہ حکومت کی جانب سے پیش کردہ بجٹ عوام کو کوئی ریلیف دینے کے بجائے مزید مہنگائی اور معاشی دبائو کی طرف دھکیل رہا ہے ،این ایف سی ایوارڈ کے بغیر بجٹ پیش کئے جانے سے صوبوں کو مالی مشکلات کا سامنا کرنا پڑتا ہے۔ انہوں نے کہا کہ بلاول بھٹو نے بیرون ملک پاکستان کی زبردست نمائندگی کی، سندھ سمیت چھوٹے صوبوں کو ان کا حق دینا ہو گا۔ سید وقار مہدی نے کہا کہ سرکاری میڈیا کے ملازمین کی پنشن میں گزشتہ چار سال سے اضافہ نہ ہوا،سب سرکاری ملازمین کی تنخواہوں اور پنشن میں اضافہ ہوا تاہم پی ٹی وی، ریڈیو پاکستان اور اے پی پی ملازمین کی پنشن میں اضافہ نہیں ہوا، ان اداروں کے بورڈ آف ڈائریکٹرز اس معاملے کو سنجیدہ سے لیں ۔