Live Updates

نئے مالی سال میں پیٹرولیم مصنوعات کی قیمتیں مزید بڑھیں گی اور آسمان سے باتیں کریں گی

وفاقی بجٹ میں پیٹرولیم مصنوعات پر ڈھائی فیصد نیا ٹیکس لگایا گیا ہے، پنجاب کے بجٹ میں صرف کمیشن والے منصوبوں کو ترجیح دی گئی۔ مشیر اطلاعات خیبرپختونخواہ بیرسٹر سیف

ثنااللہ ناگرہ منگل 17 جون 2025 21:05

نئے مالی سال میں پیٹرولیم مصنوعات کی قیمتیں مزید بڑھیں گی اور آسمان ..

پشاور ( اردوپوائنٹ اخبار تازہ ترین۔ آئی پی اے ۔17 جون 2025ء ) مشیر اطلاعات خیبرپختونخواہ بیرسٹر ڈاکٹر سیف نے کہا ہے کہ نئے مالی سال میں پیٹرولیم مصنوعات کی قیمتوں میں مزید اضافہ ہوگا۔ انہوں نے اپنے ردعمل میں کہا کہ وفاقی حکومت نے نئے مالی سال کے آغاز سے قبل عوام پر پیٹرول بم گرا دیا ہے۔ جولائی سے شروع ہونے والے نئے مالی سال میں پیٹرولیم مصنوعات کی قیمتوں میں مزید اضافہ ہوگا، وفاقی بجٹ میں پیٹرولیم مصنوعات پر ڈھائی فیصد نیا ٹیکس عائد کیا گیا ہے، نئے مالی سال کے آغاز پر پیٹرولیم مصنوعات کی قیمتیں آسمان سے باتیں کریں گی۔

پیٹرولیم مصنوعات کی قیمتوں میں اضافے سے تمام اشیائے خوردونوش کی قیمتیں بھی بڑھ جاتی ہیں۔ اسی طرح مشیر اطلاعات بیرسٹر ڈاکٹرسیف نے کہا کہ وفاقی بجٹ غریب دشمن اور امیر دوست بجٹ ہے، پنجاب حکومت کا بجٹ بھی غریب دشمن ہے۔

(جاری ہے)

پنجاب کے بجٹ میں زرعی شعبے کو مکمل طور پر نظر انداز کیا گیا ہے، پنجاب کے متاثرہ کسانوں کو بجٹ میں کوئی ریلیف نہیں دیا گیا، جعلی حکومت کی غلط پالیسیوں کے باعث پنجاب کے کسانوں کو 2200 ارب روپے کا نقصان برداشت کرنا پڑا، پنجاب میں صرف کمیشن والے منصوبوں کو ترجیح دی گئی ہے۔

پنجاب حکومت اس بجٹ میں بھی خیبرپختونخوا کی طرح صحت کی مفت سہولیات فراہم کرنے کی ہمت نہ کرسکی۔ پنجاب کو صحت کی سہولیات فراہم کرنے میں دقت ہو تو خیبر پختونخوا مدد کے لئے تیار ہے،خیبر پختونخوا میں عمران خان کے وژن کے مطابق بجٹ میں فلاحی منصوبے شامل ہیں، وزیراعلی کی قیادت میں صوبے میں فلاحی کاموں کو ترجیح دی جارہی ہے۔ دوسری جانب وزیراعلیٰ پنجاب مریم نوازشریف نے پنجاب کا بجٹ 2025-26 میں ٹیکس فری بجٹ پیش کرنے پر اظہار تشکر کیا ہے۔

وزیراعلیٰ مریم نواز شریف نے کہا ہے کہ پنجاب کی تاریخ کا سب سے بڑا ڈویلپمنٹ پروگرام پیش کرنے پراللہ تعالیٰ کا شکر ادا کرتے ہیں۔ ہمارا عزم ہے کہ شہر اور دیہات میں ترقی اور سہولیات کا فرق ختم کریں گے۔ترقی کے ثمرات اب گاؤں گاؤں پہنچیں گے۔ 1800دیہات کو ماڈل ویلج بنائیں گے۔وزیراعلیٰ مریم نواز شریف نے کہا کہ لاہور ڈویلپمنٹ پروگرام کے ساتھ پنجاب ڈویلپمنٹ پراجیکٹ بھی لارہے ہیں۔ ترقی اب امیر اور غریب کا فرق نہیں دیکھے گی، سب کیلئے ترقی برابر ہوگی۔