ایران کے اسرائیل پر تازہ حملے پہلی بار سیجل میزائل داغ دئیے،اہداف کو کامیابی سے نشانہ بنایا

تہران(اردوپوائنٹ اخبار تازہ ترین۔19جون 2025)ایران کے اسرائیل پر تازہ حملے،پہلی بار سیجل میزائل داغ دئیے،اہداف کو کامیابی سے نشانہ بنایا گیا، ایران نے آپریشن وعدہ صادق سوم کے تحت اسرائیل پر 11ویں بار میزائل اور ڈرون داغے جس میں پہلی بار سیجل میزائل کا استعمال کیا گیا ہے،ایران کی جانب سے فائر کئے گئے میزائل نے تل ابیب میں ہدف کو نشانہ بنایا۔

ایرانی میڈیا کا دعویٰ ہے کہ تہران میں ہونے والے حملے کے دوران ایران کے ڈیفنس سسٹم نے اسرائیل کے عزائم کو خاک میں ملایا اور مداخلت کر کے میزائلوں کو فضا میں ہی نشانہ بناکر ختم کردیا۔ایرانی میزائلوں اور ڈرونز کو روکنے کیلئے اسرائیل کا دفاعی نظام ایکٹیو ہوا تاہم جدید میزائلوں کی وجہ سے یہ انہیں ہدف پر پہنچنے سے روکنے میں ناکام رہا۔

(جاری ہے)

ایرانی میڈیا رپورٹ کے مطابق تہران کی جانب سے ایران کے شہر تل ابیب اور حیفہ پر جدید ٹیکنالوجی سے آراستہ طاقتور میزائل سیجل فائر کئے گئے ہیں جو انتہائی بلندی پر سفر کر کے پھر اپنے ہدف تک کامیابی کے ساتھ پہنچتے ہیں۔ایران نے دعوی کیا ہے کہ اس کی جانب سے فائر کیے گئے ایک درجن میزائلوں میں سے چند نے کامیابی کے ساتھ اپنے اہداف کو نشانہ بنایا ہے۔

ایران کی جانب سے میزائل فائر ہونے اور اسرائیلی حدود میں ڈرون و راکٹ داخل ہونے پر سائرن بھی بجائے گئے۔دوسری جانب اسرائیلی فوج نے تہران اور دیگر ایرانی علاقوں میں فضائی حملوں کا دعویٰ کرتے ہوئے بتایا ہے کہ اب ہم میزائل سسٹم اور انہیں ذخیرہ کرنے والے مقامات کو نشانہ بنائیں گے۔اسرائیلی ڈیفنس فورس نے کہا کہ آج رات تین مراحل میں حملے کئے گئے اور اس کے دوران اہم عسکری تنصیب سنٹری فیوجز کو نشانہ بنایا گیا۔

خیال رہے کہ گزشتہ روز بھی ایران نے آپریشن وعدہ صادق سوم کی دسویں لہر کا آغاز کرتے ہوئے اسرائیل پر مزید میزائل داغ دیئے  تھے۔پورے اسرائیل میں خطرے کے سائرن بج اٹھے، ایران کی پاسداران انقلاب کا اسرائیل کے خلاف تازہ حملوں کے بعد دعویٰ کیا گیاتھا کہ انہوں نے مقبوضہ علاقوں کی فضاؤں پر مکمل کنٹرول حاصل کر لیا تھا اور اسرائیلی دفاعی نظام ایرانی حملوں کے آگے بے بس ہو چکا تھا۔

ایران نے تل ابیب پر 20 میزائل داغ دیئے تھے۔ اسرائیلی حکومت نے شہریوں کو بنکر میں جانے کی ہدایت کی تھی۔اسرائیلی میڈیا رپورٹس کے مطابق ایرانی میزائلوں کی تازہ ترین بارش نے ملک بھر میں فضائی حملے کی وارننگز کو فعال کر دیا ہے جس سے شہریوں میں خوف و ہراس پھیل گیا تھا۔ اسرائیلی فوج کا کہنا تھا کہ ایران نے 20 میزائل داغے ہیں جبکہ شہریوں کو بنکرز میں جانے کی ہدایت کی گئی تھی۔

ایرانی خبر رساں ایجنسیوں میں شائع ہونے والے ایک بیان میں پاسدارانِ انقلاب نے کہا کہ ان کے طاقتور اور متحرک ''فتح میزائلوں '' نے اسرائیلی میزائل دفاعی نظام کو چیرتے ہوئے اپنے ہدف کو کامیابی سے نشانہ بنایا جو ایران کی قوت اور برتری کا واضح پیغام تھا۔پاسداران انقلاب کے ترجمان جنرل علی محمد نے کہا کہ آپریشن وعدہ صادق سوم کی یہ دسویں لہر ہے جو صبح تک جاری رہے گی۔ ہم دشمن کو ایک لمحہ کے لئے بھی امن میسر نہیں ہونے دیں گے۔ایرانی مسلح افواج کے چیف آف جنرل سٹاف میجر جنرل سید عبدالرحیم موسوی نے ویڈیو پیغام میں کہا کہ اسرائیلی جان بچانے کیلئے فوراً حیفہ اور تل ابیب چھوڑ دیں۔ ایران اسرائیلی حکومت کو اس کے جرائم کی سزا دے کر چھوڑے گا۔