عورت چاہے یا نہ چاہے، اسے مرد کی ضرورت ہوتی ہے، غنا علی

لاہور(اُردو پوائنٹ اخبارتازہ ترین - آن لائن۔ 19 جون2025ء) اداکارہ و ماڈل غنا علی نے کہا ہے کہ پاکستان جیسے معاشرے میں عورت چاہے یا نہ چائے لیکن اسے سماج میں محفوظ رہنے کے لیے مرد کی ضرورت اور سہارے کی ضرورت پڑتی ہے۔غنا علی نے حال ہی میں احمد علی بٹ کے پوڈکاسٹ میں شرکت کی، جہاں انہوں نے شوبز انڈسٹری میں پیش آنے والی مشکلات سمیت کیریئر پر بھی کھل کر بات کی۔

اداکارہ کا کہنا تھا کہ شادی کرنے کے باوجود ان کا شوبز میں کام کرنے کا جذبہ کم نہیں ہوا، ان کے لیے کام اور کیریئر اب بھی پہلی ترجیح ہیں۔انہوں نے بتایا کہ پنجاب کے دارالحکومت لاہور سے سندھ کے دارالحکومت کراچی منتقل ہونے اور شوبز کیریئر شروع کرنے میں کچھ مشکلات ضرور پیش آئیں لیکن انہوں نے کبھی ہمت نہیں ہاری۔

(جاری ہے)

جلد شادی کرنے اور بچے پیدا کرنے کے سوال پر اداکارہ نے بتایا کہ انہوں نے 26 سال کی عمر میں شادی کی اور انہیں لگا کہ وہ ہی وقت ان کی شادی کے لیے سب سے بہتر ہے۔

ان کے مطابق 26 سال کی عمر کو پہنچتے ہی انہیں محسوس ہوا کہ انہیں ساتھی اور مرد کی ضرورت ہے، اس لیے انہوں نے ادھر ادھر دیکھنے اور ساتھی ملنے کے بعد شادی کرلی۔غنا علی کا کہنا تھا کہ پاکستان کے اعلی طبقے سے تعلق رکھنے والی محض 15 سے 20 فیصد لڑکیاں ایسی ہوتی ہیں جو کیریئر، نوکری اور کام کو پہلی ترجیح دیتی ہیں اور پھر ایسی لڑکیوں کی شادیاں بھی نہیں ہوتیں۔

انہوں نے کہا کہ پاکستان کا معاشرہ مردانہ ہے، جہاں مردوں کی سوچ مختلف ہے، وہ بولڈ اور کام کرنے والی خاتون کو پسند تو کرتے ہیں لیکن ان سے شادی نہیں کرنا چاہتے۔غنا علی کے مطابق بہت سارے مرد اپنے دوستوں سے بات کرتے وقت کسی بولڈ لڑکی کی تعریفیں کریں گے اور کہیں گے کہ وہ دوستی کے لیے تو ٹھیک ہے لیکن اس سے شادی نہیں کی جا سکتی۔اداکارہ نے اس بات کو آگے بڑھاتے ہوئے کہا کہ ان کی سوچ ایسی نہیں، انہیں عورت کی زندگی میں مرد کی اہمیت کا اندازہ ہے، عورت کو چھتری اور سہارے کی ضرورت پڑتی ہے۔

انہوں نے کہا کہ پاکستانی معاشرے میں عورت چاہے یا نہ چاہے لیکن اسے مرد کے سہارے اور ساتھ کی ضرورت پڑتی ہے، مرد کے ملنے سے عورت محفوظ ہوجاتی ہے۔غنا علی کا کہنا تھا کہ شادی کے بعد وہی مرد خاتون کو عزت سے دیکھنے لگتے ہیں جو شادی سے قبل عورت کو اپنے شکار کے طور پر دیکھتے تھے۔انہوں نے شادی اور شوہر کو عورت کی ضرورت، چھتری، سہارا اور تحفظ بھی قرار دیا۔

خیال رہے کہ غنا علی نے 17 مئی 2021 کو کراچی کے کاروباری شخص عمیر گلزار سے شادی کی تھی اور ان کے ہاں اسی سال نومبر میں پہلے بچے کی پیدائش ہوئی تھی۔اداکارہ کے ہاں جنوری 2023 میں دوسرے بچے کی پیدائش ہوئی تھی، چند ماہ قبل انہوں نے ایک انٹرویو میں بتایا تھا کہ ان کے شوہر اور خاندان کے دوسرے افراد نہیں چاہتے کہ وہ اداکاری کریں لیکن شوبز میں کام کرنا ان کا جنون ہے۔