Live Updates

صوبائی حکومت گرانے کی ایک منظم سازش کی جارہی ہے،علی امین گنڈاپور

میرے پاس اختیار ہے میں کسی وقت بھی اسمبلی کو تحلیل کر سکتا ہوں، خیبرپختونخواہ حکومت کو ختم کرنے کیلئے پوری کوشش کی جارہی ہیں، وفاق آئینی حق کے نام پر فنانشل ایمرجنسی نافذ کر کے حکومت کو ختم کرنا چاہتا ہے، وزیراعلیٰ خیبرپختونخواہ کا ویڈیو پیغام

فیصل علوی جمعہ 20 جون 2025 11:40

صوبائی حکومت گرانے کی ایک منظم سازش کی جارہی ہے،علی امین گنڈاپور

پشاور(اردوپوائنٹ اخبار تازہ ترین۔20جون 2025)وزیر اعلیٰ خیبرپختونخواہ علی امین گنڈاپور کا کہنا ہے کہ صوبائی حکومت گرانے کی ایک منظم سازش کی جارہی ہے، میرے پاس اختیار ہے میں کسی وقت بھی اسمبلی کو تحلیل کر سکتا ہوں، خیبر پختونخوا حکومت کو ختم کرنے کیلئے پوری کوشش کی جارہی ہیں، اپنے ویڈیو پیغام میں وزیراعلیٰ خیبرپختونخوا علی امین گنڈاپور نے کہا کہ وفاق آئینی حق کے نام پر فنانشل ایمرجنسی نافذ کر کے خیبر پختونخوا کی حکومت کو ختم کرنا چاہتا ہے۔

ہمارے لیڈر کو جیل میں ناحق رکھا گیا ہے۔ 9 مئی کے بعد جو رویہ ہمارے ساتھ رکھا گیا اور پھر ہمارے مینڈیٹ کو چوری کیا گیا۔ خیبر پختونخوا ہ کے عوام نے اپنے مینڈیٹ کو بچایا۔میں تمام اداروں کو کھلا پیغام دے رہا ہوں مجھے حکومت کی ذمہ داری دی گئی ہے۔

(جاری ہے)

میرے پاس اختیار ہے میں کسی وقت بھی اسمبلی کو معطل کر سکتا ہوں اس کیلئے کسی وقت یا بجٹ کی ضرورت نہیں۔

وزیراعلیٰ خیبر پختونخوا ہ علی امین گنڈاپورنے بجٹ منظوری پر عمل درآمد کو روکتے ہوئے حکومتی ارکان اسمبلی کو ہدایت کی ہے کہ وہ آج ہونے والے اسمبلی اجلاس میں کوئی مطالبات زر پیش نہ کریں۔ پیر کو آئندہ کا لائحہ عمل دیا جائے گا۔ان کاکہنا ہے کہ بجٹ اجلاس بلانا گورنر کی آئینی ذمہ داری ہے لیکن گورنر نے بجٹ اجلاس نہیں بلایا۔ بانی پی ٹی آئی عمران خان کا آئینی، قانونی اور اخلاقی حق ہے کہ وہ بجٹ پر مشاورت کریں لیکن ان سے مشاورت کیلئے ملاقات کی اجازت نہیں دی جا رہی۔

وزیر اعلیٰ خیبرپختونخواہ نے اپنے ویڈیو پیغام میں پی ٹی آئی کے اراکین صوبائی اسمبلی کو ہدایت کی گئی ہے کہ وہ آئندہ بجٹ اجلاس میں کٹ موشن کی منظوری کا حصہ نہ بنیں، تاکہ کسی کو موقع نہ ملے کہ وہ اسے حکومت کے خلاف استعمال کرے۔علی امین گنڈاپور نے کہا کہ ان کا خیال ہے کہ یہ ہم سے مینڈیٹ چھین لیں گے۔میں ارکان اسمبلی اور پی ٹی آئی کے ورکرز کو بتانا چاہتا ہوں کہ یہ پھر 9 مئی اور 8 فروری کروانا چاہتے ہیں۔

ورکرز تیار ہو جائیں میں لائحہ عمل دوں گا اور یہ سازش کامیاب ہونے نہیں دوں گا۔ یہ سازش کرکے ہمیں غلام بنانے کی کوشش کریں گے لیکن ان کی سازش ناکام بنائیں گے۔علی امین گنڈاپور کا مزید کہنا تھا کہ ہم جب نکلیں گے تو اسلام آباد میں قومی اسمبلی کا بجٹ پاس ہوگا اور نہ ہی کسی اور صوبے کا بجٹ پاس کرنے دیں گے۔ ہم پورے ملک میں نکلیں گے۔ ذہنی اور جسمانی طور پر تیار ہو جائیں، اب وقت آگیا ہے اب نہیں تو کب۔