Live Updates

سوات، پنشن میں 7فیصد اضافے کیخلاف ریٹائرڈ ملازمین کا احتجاج، 23جون کو صوبائی اسمبلی کے سامنے دھرنے کا اعلان

ہفتہ 21 جون 2025 04:15

سوات(اُردو پوائنٹ اخبارتازہ ترین - این این آئی۔ 21 جون2025ء)آل پاکستان پنشنرز ایسوسی ایشن نے بجٹ میں پنشن میں صرف7 فیصد اضافے کومسترد کرتے ہوئے سوات پریس کلب کے سامنے احتجاجی مظاہرہ کیا جس میں مختلف محکموں کے ریٹائرڈ ملازمین، اساتذہ، پولیس، بینکنگ سیکٹر اور دیگر اداروں سے تعلق رکھنے والے بزرگ افراد نے بڑی تعداد میں شرکت کی۔احتجاج سے خطاب کرتے ہوئے صوبائی صدر حاجی فضل معبود، ملاکنڈ ڈویژن کے مختیار علی خان، وفاقی ریٹائرڈ ملازمین کے صدر و سابق ڈائریکٹر ظہور احمد سلطان، ڈاکٹر محمد حسن، حاجی عجب خان سمیت دیگر مقررین نے کہا کہ موجودہ تباہ کن مہنگائی کے دور میں صرف 7 فیصد پنشن اضافہ ریٹائرڈ ملازمین کے ساتھ سراسر ناانصافی ہے۔

انہوں نے حکومت سے مطالبہ کیا کہ پنشن میں کم از کم 50 فیصد اضافہ کیا جائے تاکہ بزرگ شہری اپنی گزر بسر بہتر طریقے سے کر سکیں۔

(جاری ہے)

مقررین نے کہا کہ ریٹائرڈ ملازمین نے اپنی جوانی ملک و قوم کی خدمت میں صرف کی اور اب بڑھاپے میں انہیں میڈیکل، رینٹ اور دیگر الانسز کی بھی ضرورت ہے جن میں مناسب اضافہ ناگزیر ہے۔ انہوں نے مطالبہ کیا کہ حکومت "اولڈ از گولڈ" کی پالیسی پر عملدرآمد یقینی بنائے۔

احتجاجی مظاہرے میں صوبائی رہنما ثمین خان چارسدہ، وارث خان (پولیس پنشنرز ایسوسی ایشن دیر)، اساتذہ، بینک کے سابق افسران سمیت دیگر نمائندوں نے بھی شرکت کی۔ مظاہرین نے اعلان کیا کہ اگر مطالبات تسلیم نہ کیے گئے تو 23 جون کو صوبائی اسمبلی کے سامنے بھرپور دھرنا اور احتجاج کیا جائے گا۔مقررین نے واضح کیا کہ یہ تحریک صرف پنشنرز کی نہیں بلکہ معاشرتی انصاف کی بحالی کی تحریک ہے، جس میں ملک بھر کے ریٹائرڈ ملازمین شریک ہوں گے۔