Live Updates

امریکا نے اسرائیل میں اپنے درجنوں سفارتی اہلکاروں کو واپس بلا لیا

حالات مزید کشیدہ ہونے پر امریکا نے اسرائیل میں خدمات انجام دینے والے 79 سفارتی اہلکاروں کو اسرائیل سے نکال لیا، دیگر کئی ممالک نے بھی اسرائیل سے سفارتی عملے کو واپس بلانے کا عمل شروع کر دیا

محمد علی ہفتہ 21 جون 2025 20:11

تل ابیب (اُردو پوائنٹ اخبارتازہ ترین۔ 21 جون2025ء) امریکا نے اسرائیل میں اپنے درجنوں سفارتی اہلکاروں کو واپس بلا لیا۔ تفصیلات کے مطابق ایران اسرائیل کے درمیان جاری کشیدگی میں مزید شدت آنے کے بعد امریکا کی جانب سے اسرائیل میں تعینات اپنے سفارتی عملے کی حفاظت کیلئے اہم اقدام اٹھایا گیا ہے۔ حالات مزید کشیدہ ہونے پر امریکا نے اسرائیل میں خدمات انجام دینے والے 79 سفارتی اہلکاروں کو اسرائیل سے نکال لیا۔

جبکہ امریکی میڈیا کے مطابق امریکا خطے سے اپنے شہریوں کا بھی انخلاء کر رہا ہے۔ امریکی میڈیا کے مطابق ایک ہفتے میں ایران سے سینکڑوں امریکی شہریوں نے انخلا کیا ہے۔ امریکی محکمہ خارجہ کے مطابق ایران اور اسرائیل کے درمیان فضائی جنگ شروع ہونے کے بعد سے سیکڑوں امریکی شہری زمینی راستے استعمال کرتے ہوئے ایران سے روانہ ہو چکے ہیں۔

(جاری ہے)

جبکہ اسرائیل سے بھی امریکی شہری امریکا واپس جا رہے ہیں۔

دوسری جانب دیگر کئی ممالک نے بھی اسرائیل اور ایران سے سفارتی عملے کو واپس بلانے کا عمل شروع کر دیا ۔ اسرائیل ایران کشیدگی کے دوران برطانیہ نے بھی ایران سے اپنے سفارتی عملے کو واپس بلالیا۔ میڈیا رپورٹس کے مطابق سوئٹزرلینڈ نے بھی تہران میں اپنا سفارتخانہ عارضی طور پر بند کرنیکا اعلان کردیا جب کہ برطانیہ نے بھی ایران سے اپنے سفارتی عملے کو واپس بلالیا ہے۔

دوسری جانب جرمنی نے اسرائیل سے 64 شہریوں کو نکال لیا، اس کے علاوہ متحدہ عرب امارات نے بھی ایران سے اپنے شہریوں کا انخلا مکمل کر نے کا اعلان کیا ہے۔ جبکہ واضح رہے کہ خطے کی کشیدہ صورتحال کے باعث پاکستان بھی ایران سے سینکڑوں پاکستانیوں کا اںخلاء مکمل کر چکا۔ پاکستان نے ایران سے سفارتی عملے کے کئی اراکین کو بھی پاکستان واپس بلا لیا ہے۔