پہلے ٹی ٹونٹی بلائنڈ کرکٹ ورلڈکپ کی تیاری کےلئے قومی خواتین کھلاڑیوں کا تربیتی کیمپ آئندہ ماہ 3 جولائی سے شروع ہوگا

پیر 23 جون 2025 13:06

اسلام آباد (اُردو پوائنٹ اخبارتازہ ترین - اے پی پی۔ 23 جون2025ء) پہلے ٹی ٹونٹی بلائنڈ کرکٹ ورلڈکپ کی تیاری کےلئے قومی خواتین کھلاڑیوں کا تربیتی کیمپ آئندہ ماہ 3 جولائی سے شروع ہوگا،جو تربیتی کیمپ 13 جولائی تک جاری رہے گا۔پاکستان بلائنڈ کرکٹ کونسل کے چیئرمین سید سلطان شاہ نے ’’اے پی پی‘‘ سے خصوصی گفتگو کرتے ہوئے کہا کہ پہلا خواتین بلائنڈ کرکٹ ورلڈ کپ رواں سال نومبرمیں بھارت اور نیپال میں کھیلا جائے گاجس کی تیاری کے لئے قومی خواتین کھلاڑیوں کا تربیتی کیمپ 3 سے 13جولائی تک میرپور آزاد کشمیر میں منعقد ہوگا۔

تربیتی کیمپ میں ملک بھر سے 36 خواتین کھلاڑیوں کو مدعو کیا گیا ہے جس میں سے 20 کھلاڑیوں کا انتخاب کیا جائے گا اور انہی کھلاڑیوں میں سے 16 رکنی ٹیم کا اعلان اکتوبر میں کیا جائے گا۔

(جاری ہے)

انہوں نے کہا کہ ورلڈ کپ رواں سال نومبر میں بھارت کے دو شہروں دہلی اور بنگلور میں کھیلا جائے گا جبکہ پاکستان کے تمام میچز نیپال کے شہر کھٹمنڈو میں ہوں گے اور تمام ٹیمیں پاکستان کے ساتھ کھیلنے کےلئے کھٹمنڈو آئیں گی۔

انہوں نے کہا کہ اگر پاکستان سیمی فائنل اور فائنل میں پہنچ جاتا ہے تو دونوں میچ نیپال میں ہوں گے۔ انہوں نے کہا کہ یہ ورلڈ کپ پاکستان کی ٹرمز اینڈ کنڈیشن پر ہو رہا ہے۔انہوں نے کہا کہ ورلڈ کپ میں 6ممالک کی ٹیمیں شرکت کریں گی جن میں پاکستان ،بھارت ،نیپال،انگلینڈ،آسٹریلیا اور امریکہ شامل ہیں۔انہوں نے کہا کہ دو ماہ قبل قومی خواتین کھلاڑیوں نے آسٹریلیا کا دورہ کیا تھا جو کہ دونوں ممالک کے درمیان سیریز برابر رہی ، سیریز میں صرف دو میچز کھیلے گئے جبکہ باقی تینوں میچز بارش کی نذر ہوئے، یہ سیریز قومی خواتین کھلاڑیوں کے لئے ایک اچھا موقع تھا اور امید ہے کہ قومی خواتین کرکٹ ٹیم ورلڈ کپ میں عمدہ کارکردگی کا مظاہرہ کرکے کامیابی حاصل کرے گی۔\395