راجا پرویز اشرف نے پی ٹی آئی ارکان کو ذہنی مریضوں کا ٹولہ قرار دے دیا
شور کرنے والوں کو پوچھیں کہ جنرل فیض کے علاوہ انہیں عمران خان جانتا تھا، سابق وزیراعظم
بی بی ہم شرمندہ ہیں، تیرے قاتل زندہ ہیں‘‘راجہ پرویز اشرف کی تقریر کے دور ان پی ٹی آئی کے نعرے
پیر 23 جون 2025 22:52
اسلام آباد(اُردو پوائنٹ اخبارتازہ ترین - این این آئی۔ 23 جون2025ء)سابق وزیراعظم راجا پرویز اشرف نے قومی اسمبلی میں خطاب کے دوران شور شرابہ کرنے پر پی ٹی آئی ارکان کو ذہنی مریضوں کا ٹولہ قرار دے دیا۔پیر کوقومی اسمبلی اجلاس میں اظہار خیال کرتے ہوئے راجا پرویز اشرف نے کہا کہ بجٹ تقریر میں تو آپ سب کچھ بول سکتے ہیں لیکن اعتراض اس وقت ضرور ہوتا ہے جب ایجنڈے سے ہٹ کر ذاتی آرٹیکل کرنا شروع دیں۔سابق وزیر نے کہا کہ بلاول بھٹو زرداری نے آج تقریر کی۔ انہوں نے بڑی جامع، خوبصورت اور مدلل تقریر کی۔ انہوں نے پاکستان کا مقدمہ ساری دنیا میں جا کر لڑا، بلاول بھٹو کی کامیابیاں آپ کو اپنی ناکامیاں نظر آتی ہیں۔رکن پی پی نے یاد دلاتے ہوئے کہا کہ بانی پی ٹی آئی نے کہا تھا کیا چاہتے ہو بھارت پر حملہ کر دوں ہم نے حملے کا جواب دندان شکن دیا ہے۔
(جاری ہے)
راجا پرویز اشرف کی تقریر کے دوران پی ٹی آئی ارکان نے شور شرابہ کرتے ہوئے کہا کہ اگر ہمارے لیڈر کو انٹرپٹ کریں گے تو ایک بندے کو نہیں بولنے دیں گے۔راجا پرویز اشرف نے کہا کہ یہ نفسیاتی اور لوٹے لوگ ہیں، بے وفا لوگ ہیں اور ان میں وفا نام کی کوئی چیز نہیں، یہ شور مچانے والی مشینیں ہیں۔ اگر یہ حرکتیں کریں گے تو اینٹ کا جواب پتھر سے دیں گے۔پی پی پی رکن راجا پرویز اشرف نے پی ٹی آئی کو تقاریر کرکے دکھانے کی دھمکی دے دی۔انہوں نے کہا کہ یہ ذہنی مریضوں کا ٹولہ ہے اور ان کے پاس کہنے کو کچھ نہیں ہے، یہ جنرل فیض کی پیداوار ہیں۔ اب شور کرنے والوں کو پوچھیں کہ جنرل فیض کے علاوہ انہیں عمران خان جانتا تھا۔ان لوگوں نے سیکیورٹی اسٹاف کو ماں بہن کی گالیاں دی ہیں، اسٹاف سے پتہ کریں کس کس کو گالیاں دی گئیں۔ ہم ان کو اچھی طرح جانتے ہیں، یہ کمپرومائزڈ لوگ ہیں۔دوران تقریر، پی ٹی آئی ارکان نے نعرے لگائے ’’بی بی ہم شرمندہ ہیں، تیرے قاتل زندہ ہیں‘‘۔راجا پرویز اشرف نے اپوزیشن ارکان کی طرف انگلی کرکے ’’لوٹا لوٹا‘‘ کہتے ہوئے کہا کہ یہ بانی چیئرمین کو دھوکا دیں گے، یہ جھوٹے اور غدار ہیں۔
بجٹ 26-2025ء سے متعلق تازہ ترین معلومات
