قطر پر ایرانی میزائل حملوں پر یو این چیف کو تشویش

یو این منگل 24 جون 2025 10:15

اسلام آباد (اُردو پوائنٹ ۔ UN اردو۔ 24 جون 2025ء) ایران کی طرف سے قطر پر میزائل داغنے پر اقوام متحدہ کے سربراہ انتونیو گوتیرش نے تشویش کا اظہار کرتے ہوئے ان تمام فریقین کی مذمت کی ہے جو عسکری کارروائیوں سے مشرق وسطیٰ کے تنازعہ کو بڑھاوا دے رہے ہیں۔

اطلاعات کے مطابق ایران نے سوموار کو قطر میں قائم امریکی فوجی اڈے کو نشانہ بنایا جہاں 10,000 کے قریب اہلکار تعینات ہیں۔

کہا جا رہا ہے کہ ایران کی طرف سے 7 میزائل داغے گئے جن میں سے چھ کو فضاء میں ہی مار گرایا گیا۔

(جاری ہے)

قطر پر ایرانی میزائل حملوں میں کسی کے ہلاک یا زخمی ہونے کی اطلاع سامنے نہیں آئی۔

اپنے ترجمان کے ذریعے جاری کیے گئے بیان میں سیکرٹری جنرل کا کہنا ہے کہ وہ مشرق وسطیٰ میں تنازعات کے مزید بڑھنے سے سخت پریشان ہیں۔

سکریٹری جنرل نے بارہا اس تنازعہ میں کسی طرح کی بھی شدت لانے والی کارروائیوں کی مذمت کی ہے، جس میں قطر پر ایران کا حملہ بھی شامل ہے۔ انہوں نے تمام فریقین سے فوری طور پر لڑائی بند کرنے کا کہا ہے۔

سیکرٹری جنرل نے تمام رکن ممالک پر زور دیا ہے کہ وہ اقوام متحدہ کے چارٹر اور بین الاقوامی قوانین کے دیگر قواعد کے تحت اپنی ذمہ داریاں نبھائیں۔