Live Updates

پہلگام فالس فلیگ آپریشن ، عدالت نے دو کشمیریوں کو این آئی اے کی تحویل میں دے دیا

منگل 24 جون 2025 16:34

جموں (اُردو پوائنٹ اخبارتازہ ترین - اے پی پی۔ 24 جون2025ء) غیر قانونی طور پر بھارت کے زیر قبضہ جموں و کشمیر کی ایک عدالت نے مبینہ طورپر پہلگام فالس فلیگ آپریشن میں ملوث حملہ آوروں کو پناہ دینے کے بے بنیاد الزام میں گرفتار کیے گئے دو کشمیری نوجوانوں کوپانچ روزہ ریمانڈپر بدنام زمانہ تحقیقاتی ادارے این آئی اے کی تحویل میں دیدیاہے تاہم مبصرین کشمیریوں کی گرفتاریوں اور اس سلسلے میں عدالتی کارروائی کو بھارت کی طرف سے فالس فلیگ آپریشن میں پاکستان کو ملوث کرنے کی ساز ش کا حصہ قراردے رہے ہیں ۔

کشمیرمیڈیاسروس کے مطابق بٹ کوٹ پہلگام کے رہائشی پرویز احمد جوتھراور ہل پارک پہلگام کے رہائشی بشیر احمد جوتھر کو این آئی اے نے اتوار کو گرفتار کیا تھا۔این آئی اے کے مطابق دونوں افراد نے جان بوجھ کرپہلگام حملے میں ملوث تین مسلح افراد کو پناہ دی تھی۔

(جاری ہے)

گذشتہ روز دونوں کشمیریوں کو ایڈیشنل ڈسٹرکٹ اینڈ سیشن جج جموں رتیش کمار دوبے کی عدالت میں پیش کیا گیا، عدالت نے انہیں 27جون تک تفتیش کیلئے این آئی اے کی تحویل میں دیدیا۔

دلچسپ امر یہ ہے کہ مقامی لوگوں اور سوشل میڈیا صارفین نے دونوں کشمیریوں کے خلاف این آئی اے کے الزامات کومضحکہ خیزقراردیاہے ۔ ان کے مطابق دونوں کشمیری سادہ دیہاتی ہیں اور ان کا این آئی اے کی طرف سے لگائے گئے الزامات سے کوئی تعلق نہیں۔ اگرچہ این آئی اے کا دعویٰ ہے کہ اس نے اس کیس میں اہم شواہد اکٹھے کیے ہیں لیکن ماضی کے ریکارڈ سے ظاہر ہوتا ہے کہ تحقیقاتی ادارہ کشمیری نظربندوں کی اکثریت کے خلاف عدالتوںمیں اپنے بے بنیاد اور من گھڑت الزامات ثابت کرنے میں ناکام رہتا ہے ۔اکثر کشمیری نظربندوں کو عدالتو ں میں پیش کئے بغیر برسوں تک جیلوں میں نظربند رکھاجاتاہے۔