پہلگام فالس فلیگ آپریشن : عدالت نے دو کشمیریوں کو این آئی اے کی تحویل میں دے دیا

منگل 24 جون 2025 17:51

جموں(اُردو پوائنٹ اخبارتازہ ترین - این این آئی۔ 24 جون2025ء)غیر قانونی طور پر بھارت کے زیر قبضہ جموں و کشمیر کی ایک عدالت نے مبینہ طورپر پہلگام فالس فلیگ آپریشن میںملوث حملہ آوروں کو پناہ دینے کے بے بنیاد الزام میں گرفتار کیے گئے دو کشمیری نوجوانوں کوپانچ روزہ ریمانڈپر بدنام زمانہ تحقیقاتی ادارے این آئی اے کی تحویل میں دیدیاہے۔ تاہم مبصرین کشمیریوں کی گرفتاریوں اور اس سلسلے میں عدالتی کارروائی کو بھارت کی طرف سے فالس فلیگ آپریشن میں پاکستان کو ملوث کرنے کی ساز ش کا حصہ قراردے رہے ہیں ۔

کشمیرمیڈیاسروس کے مطابق بٹ کوٹ پہلگام کے رہائشی پرویز احمد جوتھراور ہل پارک پہلگام کے رہائشی بشیر احمد جوتھر کو این آئی اے نے اتوار کو گرفتار کیا تھا۔این آئی اے کے مطابق دونوں افراد نے جان بوجھ کرپہلگام حملے میں ملوث تین مسلح افراد کو پناہ دی تھی۔

(جاری ہے)

پیر کے روز دونوں کشمیریوں کو ایڈیشنل ڈسٹرکٹ اینڈ سیشن جج جموں رتیش کمار دوبے کی عدالت میں پیش کیا گیا، عدالت نے انہیں 27جون تک پانچ دن کیلئے تفتیش کیلئے این آئی اے کی تحویل میں دیدیا۔

دلچسپ امر یہ ہے کہ مقامی لوگوں اور سوشل میڈیا صارفین نے دونوں کشمیریوں کے خلاف این آئی اے کے الزامات کومضحکہ خیزقراردیاہے ۔ ان کے مطابق دونوں کشمیری سادہ دیہاتی ہیں اور ان کا این آئی اے کی طرف سے لگائے گئے الزامات سے کوئی تعلق نہیں۔ اگرچہ این آئی اے کا دعویٰ ہے کہ اس نے اس کیس میں اہم شواہد اکٹھے کیے ہیں، لیکن ماضی کے ریکارڈ سے ظاہر ہوتا ہے کہ تحقیقاتی ادارہ کشمیری نظربندوں کی اکثریت کے خلاف عدالتوںمیں اپنے بے بنیاد اور من گھڑت الزامات ثابت کرنے میں ناکام رہتا ہے ۔اکثر کشمیری نظربندوں کو عدالتو ں میں پیش کئے بغیر برسوں تک جیلوں میں نظربند رکھاجاتاہے۔