اسرائیل کا صدر ٹرمپ کی تجویز کردہ جنگی بندی کی تجویز قبول کرنے کا اعلان

منگل 24 جون 2025 18:22

تل ابیب (اُردو پوائنٹ اخبارتازہ ترین - این این آئی۔ 24 جون2025ء)اسرائیلی وزیر اعظم کے دفتر نے اس بات کی تصدیق کی ہے کہ اسرائیل نے امریکا کی ثالثی میں طے پانے والی جنگ بندی کی تجویز کو قبول کر لیا ہے، جو ایران کے ساتھ تقریباً دو ہفتوں کی براہ راست جنگ کے بعد سامنے آئی ہے۔اسرائیلی میڈیا کے مطابق اسرائیلی وزیراعظم کے دفتر سے جاری بیان میں کہا گیا ہے کہ آپریشن کے اہداف کے مکمل حصول اور امریکی صدر ڈونلڈ ٹرمپ کے ساتھ مکمل ہم آہنگی کے پیش نظر اسرائیل نے دو طرفہ جنگ بندی کی امریکی تجویز کو قبول کر لیا ہے۔

(جاری ہے)

رپورٹ کے مطابق اسرائیلی حکومت کے بیان میں کہا گیا ہے کہ ’گزشتہ رات وزیر اعظم بنجمن نیتن یاہو نے کابینہ کا اجلاس بلایا تاکہ یہ اعلان کیا جا سکے کہ اسرائیل نے آپریشن رائزنگ لائن کے تمام مقاصد (بلکہ اس سے بھی بڑھ کر) حاصل کر لیے ہیں۔بیان میں کہا گیا کہ ’اسرائیل نے اپنے وجود کو لاحق دو فوری خطرات (جوہری اور بیلسٹک) کو ختم کر دیا ہے۔حکومت نے کہا کہ اسرائیل، دفاع میں حمایت اور ایرانی جوہری خطرے کے خاتمے میں شرکت پر صدر ٹرمپ اور امریکا کا شکریہ ادا کرتا ہے۔بیان کے آخر میں تنبیہ کی گئی کہ اسرائیل جنگ بندی کی کسی بھی خلاف ورزی پر بھرپور جواب دے گا۔