ایشیاء کپ 2025ء: بھارتی براڈ کاسٹر نے آفیشل پوسٹر سے "پاکستان" بھی غائب کردیا

شائقین کرکٹ نے سونی سپورٹس کو آڑے ہاتھوں لے لیا

ذیشان مہتاب بدھ 25 جون 2025 13:28

ایشیاء کپ 2025ء: بھارتی براڈ کاسٹر نے آفیشل پوسٹر سے "پاکستان" بھی غائب ..

ممبئی (اردو پوائنٹ تازہ ترین اخبار ۔ 25 جون 2025ء ) ایشیاء کپ 2025ء کے تاریک مستقبل کے دوران بھارتی براڈکاسٹر نے پاکستان کو پوسٹر سے بھی ہٹا دیا۔

سماجی رابطے کی سائٹ ایکس (ٹوئٹر) پر سونی اسپورٹس نے رواں سال کے آخر میں ہونے والے ایشیا کپ ایونٹ کا ایک پوسٹر جاری کیا، جس میں بنگلادیشی، سری لنکن اور بھارتی کپتان موجود ہیں تاہم پاکستان کی نمائندگی کیلئے کوئی موجود نہیں۔

بھارتی براڈ کاسٹر کی جانب سے شیئر کردہ پوسٹ پر انہیں شدید تنقید کا نشانہ بنایا جارہا ہے۔

قبل ازیں خبریں سامنے آئیں تھی کہ پاکستان اور ہندوستان کے درمیان ہونیوالی سرحدی کشیدگی کے باوجود بھارتی ٹیم ایشیاکپ ایونٹ میں حصہ لے گی۔

ٹی20 ورلڈکپ کے انعقاد سے قبل پاک بھارت ہائی وولٹیج مقابلہ مداحوں کو دیکھنے کا ملے گا کیونکہ ایشیاء کپ 2025ء میں روایتی حریف ایک دوسرے کے مدمقابل آئیں گے۔

(جاری ہے)

ایونٹ کی میزبابی متحدہ عرب امارات (یو اے ای) کرے گا تاہم میزبانی کی رائٹس بھارت کے ہی سپرد ہوں گے۔

تاہم بھارتی براڈکاسٹر نے ایک مرتبہ پھر ہائی وولٹیج مقابلے سے قبل ماحول گرمانے کیلئے پاکستانی کپتان کو آفیشل پوسٹر میں شامل نہیں کیا، جس نے کھیل سے محبت کرنیوالے شائقین کرکٹ کو آگ بھڑکا دیا ہے۔

دوسری جانب ایشیاکپ کا انعقاد رواں برس ستمبر میں ہونا ہے، تاہم اس حوالے سے کوئی باضابطہ شیڈول جاری نہیں ہوسکا ہے تاہم آفیشل براڈ کاسٹر کی جانب سے پوسٹر جاری کرنے سے قیاس کیا جارہا ہے کہ اب ایونٹ اپنے وقت پر ہی منعقد ہوگا۔

واضح رہے کہ رواں برس ہونیوالا ایشیاء کپ ٹی20 فارمیٹ پر کھیلا جائے گا، جس کا مقصد ٹی20 ورلڈکپ 2026ء کی تیاری کرنا ہے۔