ایرانی عوام سے یکجہتی کے اظہار کے لیے ILFکا وفد کا ایرانی قونصلیٹ کراچی کا دورہ

پاکستان کے عوام صہیونی سازشوں اور مغربی میڈیا کے منفی کردار سے بخوبی واقف ہیں، قونصل جنرل وحید اصغری

بدھ 25 جون 2025 18:06

کراچی(اُردو پوائنٹ اخبارتازہ ترین - این این آئی۔ 25 جون2025ء) موجودہ علاقائی کشیدگی کے تناظر میں ایرانی عوام اور قیادت سے غیر متزلزل یکجہتی کے اظہار کے لیے انٹرنیشنل لائرز فورم کے وفد نے اسلامی جمہوریہ ایران کے قونصلیٹ کراچی کا دورہ کیا۔وفد میں چیئرمین انٹرنیشنل لائرز فورم ناصر احمد ایڈوکیٹ، ملا محمد امین انصاری، بانی صدر متحدہ علماء محاذ مولانا انتظار تھانوی اور دیگر معزز اراکین شامل تھے۔

اس موقع پر مولانا انتظار تھانوی نے ایرانی فوجی اور شہری شہداء کے درجات کی بلندی، ایران کی ترقی، خوشحالی اور امن کے لیے دعا کی۔وفد نے سپریم لیڈر آیت اللہ علی حسینی خامنہ ای کو خراجِ عقیدت پیش کیا اور ان کی عظیم قیادت اور عالمی چیلنجز کے مقابلے میں ان کی غیر معمولی حکمت عملی کو سراہا۔

(جاری ہے)

پاکستانی عوام کی جانب سے انٹرنیشنل لائرز فورم کے چیئرمین ناصر احمد نے ایرانی قونصل جنرل کو یکجہتی کا باضابطہ پیغام پیش کیا، جس میں کہا گیا’’پاکستان اور ایران کے عوام کے دل ایک ساتھ دھڑکتے ہیں۔

بطور پڑوسی قوم ہم ایران کی مکمل حمایت کرتے ہیں اور اسرائیل اور اس کے حمایتیوں کے حالیہ جارحانہ حملے کی سخت الفاظ میں مذمت کرتے ہیں۔ ہم ایرانی قونصلیٹ کے توسط سے ایرانی عوام کو یہ پیغام دینا چاہتے ہیں کہ وہ اس آزمائش میں تنہا نہیں ہیں۔ ہم اسلامی تعاون تنظیم (OIC)، اقوامِ متحدہ، سلامتی کونسل اور ان اسلامی ممالک کے کردار کی بھی شدید مذمت کرتے ہیں جو اسرائیل سے دوستانہ تعلقات رکھے ہوئے ہیں۔

ہم مطالبہ کرتے ہیں کہ ایسے تمام اسلامی ممالک فوری طور پر اسرائیل سے اپنے سفارتی و اقتصادی تعلقات منقطع کریں۔اس موقع پر ایرانی قونصل جنرل اصغر وحیدی نے وفد کے دورے اور اظہارِ یکجہتی پر تہہ دل سے شکریہ ادا کرتے ہوئے کہا کہ پاکستان کے عوام صہیونی سازشوں اور مغربی میڈیا کے منفی کردار سے بخوبی واقف ہیں۔ کراچی میں ایران کے حق میں نکالی گئی احتجاجی ریلیاں دونوں ممالک کے عوام کے درمیان گہرے تعلقات کا منہ بولتا ثبوت ہیں۔ ہم اس وفد کی آمد اور ان کے خلوص کے اظہار کو قدر کی نگاہ سے دیکھتے ہیں۔یہ دورہ باہمی احترام اور پاکستان و ایران کے عوام کے درمیان برادرانہ تعلقات کے اعادے پر ختم ہوا۔