پاکستان میں تعینات فلسطین کے سفیر ڈاکٹر زوہیر زاہد نے نیشنل پریس کلب اسلام آباد کا دورہ

بدھ 25 جون 2025 19:25

اسلام آباد (اُردو پوائنٹ اخبارتازہ ترین - اے پی پی۔ 25 جون2025ء) پاکستان میں تعینات فلسطین کے سفیر ڈاکٹر زوہیر زاہد نے نیشنل پریس کلب اسلام آباد کا دورہ کیا اور صدر این پی سی اظہر جتوئی، سیکرٹری نیئر علی، سینئر نائب صدر احتشام الحق، نائب صدر سید ظفر ہاشمی، جوائنٹ سیکرٹری جاوید بھاگٹ سمیت ممبران گورننگ باڈی، نوید احمد شیخ،تنویر شہزاد، راجہ ماجد افسر منتخب عہدیداران سے ملاقات کی۔

سیکرٹری نیشنل پریس کلب نیئر علی نے معزز مہمان کو این پی سی کے حوالے سے بریف کیا۔

(جاری ہے)

اس موقع پر فلسطینی سفیر ڈاکٹر زوہیر زاہد کا کہنا تھا کہ نیشنل پریس کلب کا شکر گزار ہوں کہ مجھے یہاں مدعو کیا، مضبوط پاکستان فلسطین کی بقاء کے لیے ضروری ہے، پاکستان نے اپنے قیام کے ساتھ ہی فلسطین کا نہ صرف ہر موقع پر ساتھ دیا بلکہ مسئلہ فلسطین پر دنیا بھر میں ہمارا مقدمہ لڑا، ہمارے دل ایک ساتھ دھڑکتے ہیں۔ ان کا کہنا تھا کہ برادر ممالک کے درمیان انتہائی قریبی دیرینہ تعلقات ہیں، فلسطینی پاکستان کو اپنا دوسرا گھر سمجھتے ہیں اوراس سے دلی محبت کرتے ہیں۔ انہوں نے مظلوم فلسطینیوں کے لیے پاکستان کی امداد پر شکریہ ادا کیا۔ اس موقع پر فلسطینی سفیر کو این پی سی کا دورہ بھی کرایا گیا۔