گھرمیں آگ لگنے سے چھت پرسویا ہوا پولیس کانسٹیبل جھلس کر جاں بحق

متوفی گھر پر اکیلا رہائش پذیر تھا جو سوتے میں ہی آگ کی لپیٹ میں آگیا،پولیس حکام

جمعہ 27 جون 2025 17:16

کراچی(اُردو پوائنٹ اخبارتازہ ترین - این این آئی۔ 27 جون2025ء)نارتھ کراچی کے گھر میں آگ لگنے سے چھت پر سویا ہوا پولیس کانسٹیبل جھلس کر جاں بحق ہوگیا۔اطلاعات کے مطابق سرسید تھانے کے علاقے مکان نمبر ایل 804، نارتھ کراچی سیکٹر7/A بلال کالونی کچی آبادی شیشہ ہوٹل کے قریب گھر سے ایک شخص کی سوختہ لاش ملی۔جاں بحق ہونے والے شخص کی لاش ایدھی ایمبولینس کے ذریعے عباسی شہید اسپتال منتقل کی گئی۔

(جاری ہے)

ترجمان کراچی پولیس کے مطابق متوفی کی شناخت 55 سالہ حاجن ولد جمن کے نام سے کی گئی۔جھلس کو جاں بحق ہونے والا شخص پولیس کانسٹیبل تھا جو پولیس ہیڈ کوارٹر ویسٹ میں تعینات تھا۔ متوفی گھر میں اکیلا رہائش پذیر تھا۔ جمعرات کی شب گھر میں آگ لگ گئی۔ متوفی چھت پر چارپائی پر سورہا تھا جو سوتے میں ہی آگ کی لپیٹ میں آکر جاں بحق ہوگیا۔متوفی کی لاش پولیس کارروائی کے بعد سردخانے منتقل کردی گئی ہے۔