سندا کسی کی نہیں سنتی تھی عامر سے لڑتی اوربہکی بہکی کرتی تھی،کراچی آنے والی تیونس کی لڑکی کے سسرالیوں کا بیان سامنے آ گیا

کراچی(اردوپوائنٹ اخبار تازہ ترین۔28جون 2025) سندا کسی کی نہیں سنتی تھی وہ عامر سے لڑتی اوربہکی بہکی باتیں کرتی تھی، کراچی آنے والی تیونس کی لڑکی کے سسرالیوں کابیان سامنے آگیا، لیاری کے نوجوان عامرکے اہلخانہ کے مطابق شادی کے بعد لڑکی عجیب و غریب حرکات کرتی رہی، جنگ سے گفتگو کرتے ہوئے ان کا کہنا تھا کہ وہ بات بات پر عامر سے لڑتی تھی اور اس پر تشدد کرنے لگی جس سے گھر کا سکون برباد ہو گیا تھا۔

عامر کے اہلخانہ کایہ بھی کہنا تھا کہ تیونس سے پاکستان آنے سے وہ سندا کو بار بار منع کرتے رہے کہ وہ اس کے اخراجات برداشت نہیں کر سکیں گے مگر لڑکی نے ہر طرح کے حالات میں رہنے کا یقین دلایا اور بضد ہو کر پاکستان پہنچی۔اہلخانہ کامزید یہ بھی کہنا تھا کہ سندا کسی کی نہیں سنتی تھی وہ اکثر بہکی بہکی باتیں اور حرکتیں کرتی تھی۔

(جاری ہے)

دوپٹے اور چپل کے بغیر گھر سے باہر نکل کر کھڑے ہو جاتی ہے وہ اس سے عاجز آچکے ہیں اور کسی صورت سمجھوتہ نہیں کر سکتے۔

روز روز کے جھگڑوں کے باعث جب حالات قابو سے باہوگئے تو بالاخرہم سب نے فیصلہ کیا کہ ان دونوں کی علیحدگی کروا دی جائے۔دوسری جانب پولیس کے مطابق لڑکی نے لڑکے کے خلاف تشدد یا زیادتی کی کوئی شکایت نہیں کی۔ پولیس اس سلسلے میں عورت ہونے کے ناطے اسے شیلٹر دے رہی ہے اور اس کی واپسی کا انتظام بھی کیا جا رہا ہے۔واضح رہے کہ فیس بک پر دوستی کے بعد کراچی پہنچنے والی 19 سالہ سندا ایاری کو شادی کے چند ماہ بعد شوہر نے طلاق دیدی تھی۔

کراچی کے ایک اور نوجوان نے غیرملکی لڑکی کو سہانے خواب دکھا کر شہر میں تنہا چھوڑ دیاتھا۔ تیونس سے تعلق رکھنے والی 19 سالہ سندا ایاری کراچی کے وومن تھانے پہنچی جہاں اس نے پناہ کی درخواست دی تھی۔بتایاگیا تھا کہ لیاری کے علاقے نیا آباد کے رہائشی 19 سالہ محمد عامر کی فیس بک پر تیونس کی سندا ایاری سے دوستی ہوئی تھی جس کے بعد لڑکی 28 نومبر کو کراچی پہنچی۔

پولیس کے مطابق لڑکی 28 نومبر 2024 کو کراچی آئی تھی اس کی اولڈ سٹی ایریا کے علاقے نیا آباد کھڈا مارکیٹ لیاری کے رہائشی محمد عامر سے سوشل میڈیا پر دوستی ہوئی تھی محبت میں مبتلا دونوں نے شادی کا فیصلہ کیا جس کیلئے سندا پاکستانی ویزا حاصل کرکے کراچی پہنچ گئی۔عامر نے اسے ایئرپورٹ سے ریسیو کیاتھا اور اگلے ہی دن عامر کے اہل خانہ نے ایک تقریب میں دونوں کی شادی کرادی گئی تھی۔

سندا کا نکاح 6 مارچ کو یونین کونسل بغدادی، لیاری میں رجسٹرڈ ہوا تھا۔ خاتون کے مطابق شادی کے ابتدائی ایام خوشگوار تھے تاہم کچھ ماہ بعد معمولی باتوں پر جھگڑے شروع ہو گئے تھے۔ بات بڑھتے بڑھتے طلاق تک جا پہنچی اور عامر نے سندا کو طلاق دے دی۔اب وہ اپنے وطن واپس جانا چاہتی تھی۔ویمن پولیس تھانے کی جانب سے بتایا گیا تھا کہ لڑکی نے شوہر کے خلاف کسی بدسلوکی یا تشدد کی شکایت نہیں کی۔

اسے حفاظتی پناہ دے دی گئی ہے۔ عامر کو تھانے بلوایا گیا تھا جس نے تصدیق کی کہ اس نے سندا کو طلاق دی ہے، اور اس کے بعد چلا گیا تھا۔حکام کا کہنا تھا کہ امیگریشن حکام سے رابطے کے بعد سندا کی واپسی کا قانونی عمل مکمل کیا جائے گا۔ریکارڈ کے مطابق سندا کا پاکستان کا 90 دن کا ویزا 18 فروری کو زائد المیعاد ہو چکا تھا۔ ویزے کی تجدید یا ایگزٹ پرمٹ کے بغیر وہ واپس نہیں جا سکتی۔

ویزا کی تجدید کے لگ بھگ 400 امریکی ڈالر اور سوا دو لاکھ سے زائد کی فضائی ٹکٹ کے انتظام کا بھی لڑکی پر بوجھ تھا۔سندا کا کہنا تھا کہ اس کا پاکستانی ویزا 18 فروری کو ختم ہو چکا ہے اور شوہر نے ساتھ رکھنے سے صاف انکار کردیا تھا۔ سندا نے اپیل کی ہے کہ چونکہ اس کے پاس وطن واپسی کے اخراجات نہیں تھے لہٰذا حکومت پاکستان اسے ایگزٹ پرمٹ جاری کرے تاکہ وہ واپس جا سکے۔