ہمارے آباواجداد نے بڑی قربانیوں کے بعد پاکستان حاصل کیا لہٰذا ہمیں اس کی قدر کرنی چاہئے،مقررین

پیر 30 جون 2025 19:50

لاہور (اُردو پوائنٹ اخبارتازہ ترین - اے پی پی۔ 30 جون2025ء) نئی نسل پاکستان کا مستقبل ہے اور ہمارے بچے بڑے باصلاحیت ہیں جو دنیا بھر میں پاکستان کا نام روشن کر رہے ہیں۔ہمارے آباواجداد نے بڑی قربانیوں کے بعد پاکستان حاصل کیا لہٰذا ہمیں اس کی قدر کرنی چاہئے۔ ان خیالات کا اظہار مقررین نے ایوان کارکنان تحریک پاکستان میں جاری نظریاتی سمر سکول کے سولہویں روز طلباوطالبات سے خطاب کے دوران کیا۔

اس سکول کا ماٹو ’’پاکستان سے پیار کرو‘‘ ہے۔ سابق ڈین فیکلٹی آف آرٹس اینڈ ہیومینیٹیز پنجاب یونیورسٹی پروفیسر ڈاکٹر محمد اقبال چاولہ نے کہا کہ آج میری زندگی کا خوش قسمت ترین دن ہے کہ میں قوم کے ہونہار بچوں سے ملاقات کرر ہا ہوں۔ آپ اپنی سوچ کو ہمیشہ تعمیری رکھیں اور سوشل میڈیا کامثبت استعمال کریں۔

(جاری ہے)

آپ کے والدین نے نظریاتی تعلیم وتربیت کی غرض سے آپ کو یہاں بھیجا ہے ، آپ دل لگا کر تعلیم حاصل کریں اور مشاہیر تحریک پاکستان کی حیات وخدمات کا مطالعہ کریں۔

معروف سماجی شخصیت و سہارا ویلفیئر فائونڈیشن ناروے کے چیئرمین حافظ محمد اسلم حق نے کہا کہ آزادی حاصل کرنے کیلئے ہمارے آباواجداد نے جان ومال کی لازوال قربانیاں دیں۔ آج ہم جو کچھ ہیں پاکستان کی بدولت ہیں۔ یہاں موجود بچوں کا اعتماد دیکھ کر مجھے بڑی خوشی ہوئی ہے۔مشاہیر تحریک پاکستان نے جہدِ مسلسل سے اپنا منفرد مقام بنایا ، آپ بھی دن رات محنت کریں اور بڑے ہو کر پاکستان کا نام دنیا بھر میں روشن کریں۔