سیکرٹری داخلہ پنجاب کی پروونشل انٹیلی جنس سینٹر آمد،صوبہ بھر میں محرم الحرام کے جلوسوں و مجالس کی لائیو مانیٹرنگ کی

لاہور (اُردو پوائنٹ اخبارتازہ ترین - این این آئی۔ 01 جولائی2025ء) سیکرٹری داخلہ پنجاب ڈاکٹر احمد جاوید قاضی نے پروونشل انٹیلی جنس سینٹر کا دورہ کیا اور مرکزی کنٹرول روم سے صوبہ بھر میں محرم الحرام کے جلوسوں و مجالس کی لائیو مانیٹرنگ کی۔ اس موقع پر پروونشل انٹیلیجنس سینٹر افسران نے صوبہ بھر میں موجودہ صورتحال بارے بریفنگ دی۔ بریفنگ میں بتایا گیا کہ پنجاب میں محرم الحرام کے دوران 37087مجالس اور 9825جلوسوں کی مانیٹرنگ کی جا رہی ہے۔

تمام مجالس اور جلوسوں کو حساسیت کے مطابق کیٹیگری اے ، بی اور سی میں تقسیم کیا گیا ہے تاہم سکیورٹی میں کوئی کوتاہی برداشت نہیں کی جائے گی۔ پنجاب بھر کی مجالس اور جلوسوں کی میپ پر جیو ٹیگنگ کی گئی ہے اور تمام مقامات کو جدید کیمروں سے سینٹرل کنٹرول روم میں مانیٹر کیا جا رہا ہے۔

(جاری ہے)

پنجاب میں 1421ذاکرین و مقررین کی ضلع بندی اور 809کی زباں بندی کے احکامات جاری ہوئے جبکہ امن و امان کے قیام کیلئے پنجاب میں 1444افراد کو شیڈول فور میں رکھا گیا ہے۔

صوبہ بھر میں 1لاکھ 10ہزار سے زائد پولیس افسران و اہلکار محرم الحرام سکیورٹی ڈیوٹی پر مامور ہیں جنکی امداد کیلئے آرمی کی 59اور رینجرز کی 79کمپنیاں تعینات کی جا رہی ہیں۔ ترجمان محکمہ داخلہ پنجاب نے بتایا کہ پاکپتن میں عرس بابا فرید الدین مسعود گنج شکر رح کے انتظامات مکمل ہیں اور آج شام سے پاکپتن میں بہشتی دروازہ زائرین کیلئے کھولا جا رہا ہے۔

اسی طرح حضرت علی بن عثمان ہجویری رح کے مزار پر غسل کی تقریب 9 محرم الحرام کو ہو گی جس کے تمام انتظامات مکمل کر لیے گئے ہیں۔ سیکرٹری داخلہ پنجاب ڈاکٹر احمد جاوید قاضی نے سائیبر پٹرولنگ سیل سے قابل اعتراض مواد کی مانیٹرنگ اور رپورٹنگ کے عمل کا جائزہ لیا۔ اس موقع پر گفتگو کرتے ہوئے سیکرٹری داخلہ پنجاب کا کہنا تھا کہ صوبہ بھر میں جاکر انتظامات کا جائزہ لیا تمام انتظامیہ اور پولیس پوری طرح مستعد ہیں۔

تمام مرکزی مجالس اور جلوسوں کی لائیو مانیٹرنگ کیلئے سی سی ٹی وی کیمرے نصب کیے گئے ہیں اور فزیکل سپیس کیساتھ ساتھ ڈیجیٹل سپیس کو بھی محفوظ بنایا جا رہا ہے۔ انہوں نے بتایا کہ سوشل میڈیا پر مذہبی منافرت پھیلانے والوں کیخلاف قانونی کارروائی کی جا رہی ہے اور اب تک مختلف اضلاع سے 50 سے زائد گرفتاریاں عمل میں لائی گئی ہیں۔ انہوں نے بتایا کہ محرم الحرام کیلئے خصوصی ای پورٹل تیار کیا گیا جو تمام اضلاع سے منسلک ہے۔

ای پورٹل پر محرم الحرام کے حوالے سے تمام معلومات رئیل ٹائم اپڈیٹ ہو رہی ہیں۔ محرم الحرام انتظامات کی نگرانی کیلئے کابینہ کمیٹی برائے امن و امان، پاکستان علما کونسل اور اتحاد بین المسلمین کمیٹی نے صوبہ بھر کا دورہ کیا۔ انہوں نے انتظامیہ کو ہدایت کی کہ امن و امان کیلئے محکمہ داخلہ کے جاری کردہ قواعد و ضوابط پر عملدرآمد یقینی بنایا جائے۔ اس موقع پر سپیشل سیکرٹری داخلہ فضل الرحمان، ایڈیشنل سیکرٹری انٹرنل سکیورٹی احسان جمالی، ایڈیشنل سیکرٹری ہوم عاصمہ چیمہ اور متعلقہ حکام بھی موجود تھے۔