جموں وکشمیر ،ضلع کولگام کے رہائشی ڈاکٹر عبدالباری پر کالا قانون ”پی ایس اے“ لاگو کر دیاگیا، مسلم لیگی رہنما اسداللہ پرے دوبارہ گرفتار

جمعرات 3 جولائی 2025 13:14

سری نگر (اُردو پوائنٹ اخبارتازہ ترین - اے پی پی۔ 03 جولائی2025ء) بھارت کے غیر قانونی زیر تسلط جموں وکشمیر میں بھارتی پولیس نے ضلع کولگام کے رہائشی ڈاکٹر عبدالباری نائیک پر کالا قانون پبلک سیفٹی ایکٹ لاگو کر دیا ہے۔ کشمیر میڈیا سروس کے مطابق معروف استاد اور سماجی کارکن ڈاکٹر عبدالباری کے اہل خانہ نے ذرائع ابلاغ کو بتایا کہ ڈاکٹر عبدالباری کو پیر کو سری نگر کے ایک تھانے میں طلب کیا گیا جہاں انہیں حراست میں لیا گیا اور ان کے خلاف کالا قانون پی ایس اے کے تحت مقدمہ درج کیا گیا۔

(جاری ہے)

ڈاکٹر عبدالباری نائیک گورنمنٹ ڈگری کالج ادھم پور میں جغرافیہ کے اسسٹنٹ پروفیسر کے طور پر خدمات انجام دے چکے ہیں۔ قبل ازیں انہیں 2021میں ایک سوشل میڈیا پوسٹ پر گرفتار کیا گیا تھا ۔ اس وقت ان کے خلاف غیر قانونی سرگرمیوں کی روک تھام کے کالے قانون ”یو اے پی اے“ کے تحت مقدمہ درج کیا گیا تھا۔بعد ازیں انہیں نئی دہلی کے مسلط کردہ لیفٹیننٹ گورنر کے ماتحت انتظامیہ نے ملازمت سے برطرف کر دیا تھا۔دریں اثنا بھارتی پولیس نے مسلم لیگی رہنما اسد اللہ پرے کو بانڈی پورہ کے علاقے حاجن سے گرفتار کر لیا۔ اسد اللہ پرے کو حال ہی میں 2 برس کی غیر قانونی نظر بندی کے بعد رہا کیا گیا تھا۔